ରାୟଗଡା: ରାୟଗଡା ଜିଲ୍ଲାର ଟିକିରି ଥାନା ଅଂଚଳର ରତଛୁଆଁରେ ଏକ ଯାତ୍ରା ପାର୍ଟି ଓଲଟିବା ଫଳରେ ୧୨ଜଣ ଗୁରୁତର ହୋଇଥିବା ଖବର ମିଳିଛି ।
ଖବର ଅନୁଯାୟୀ, ଗତକାଲି ଶିବରାତ୍ରି ଅବସରରେ ଶିଳାପାଶ ଗ୍ରାମର ଏକ ଯାତ୍ରା ପାର୍ଟି ନିକଟସ୍ଥ କୋଡ଼ିପାର ଗାଁରେ ନାଟକ ପରିବେଷଣ କରିଥିଲେ। ଏହାପରେ ସେହି ଯାତ୍ରା ପାର୍ଟିର କଳାକାରମାନେ ଆଜି ସକାଳେ ଏକ ଟ୍ରାକ୍ଟର ଯୋଗେ ନିଜ ଗାଁକୁ ଫେରୁଥିଲେ। ରତଛୁଆଁ ପାଖରେ ଥିବା ଏକ ବୁଲାଣିରେ ହଠାତ୍ ଏକ ବାଇକ୍ ବିପରୀତ ଦିଗରୁ ଆସିଥିଲା। ସେହି ବାଇକ୍ ଚାଳକକୁ ଦୁର୍ଘଟଣାରୁ ରକ୍ଷା କରିବାକୁ ଯାଇ ଟ୍ରାକ୍ଟର ଚାଳକ ବ୍ରେକ୍ ଦେଇଥିଲେ। ଏହା ଫଳରେ ଟ୍ରାକ୍ଟରଟି ଓଲଟି ପଡ଼ିଥିଲା।
ଏଥିରେ ଟ୍ରାକ୍ଟର ଚାଳକଙ୍କ ସମେତ ସେଥିରେ ଥିବା ସମସ୍ତ ୧୨ଜଣ ଗୁରୁତରଭାବେ ଆହତ ହୋଇଥିଲେ। ଏହା ଦେଖି ସ୍ଥାନୀୟ ଲୋକେ ଆହତମାନଙ୍କୁ ଉଦ୍ଧାର କରି ନିକଟସ୍ଥ ଟିକିରି ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରରେ ଭର୍ତି କରିଥିଲେ। ସେମାନଙ୍କ ମଧ୍ୟରୁ ୫ଜଣଙ୍କ ଅବସ୍ଥା ସଂକଟାପନ୍ନ ହେବାରୁ ସେମାନଙ୍କୁ କୋରାପୁଟର ସହିଦ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସ୍ପିଟାଲକୁ ସ୍ଥାନାନ୍ତରିତ କରାଯାଇଥିବା ଜଣାଯାଇଛି। ଏହି ଗୁରୁତରମାନେ ମାନ ଝୋଡିଆ, ଜୟଦାନ, ସବାସନ, କାଳିଆ ଓ ରଘୁନାଥ ବୋଲି ଜଣାଯାଇଛି।