ଆଜିଠାରୁ ବଢ଼ିବ ତାତି

ଭୁବନେଶ୍ୱର: ଆଜିଠାରୁ ରାଜ୍ୟରେ ତାତି ବଢ଼ିବ । ସାରା ରାଜ୍ୟରେ ପାଗ ଖୁଖିଲା ରହିବା ସହ ରାଜ୍ୟର ଅଧିକାଂଶ ସ୍ଥାନରେ ତାପମାତ୍ରା ୪୦ ଡିଗ୍ରୀ ଉପରେ ରହିପାରେ । ଆଂଚଳିକ ପାଣିପାଗ ବିଭାଗ ତରଫରୁ ମିଳିଥିବା ରିପୋର୍ଟ ଅନୁଯାୟୀ, ଆସନ୍ତାକାଲି ଅର୍ଥାତ୍ ୨୮ ତାରିଖରୁ ରାଜ୍ୟର କେତେକ ସ୍ଥାନରେ ବର୍ଷା ହେବାର ସମ୍ଭାବନା ରହିଛି, କିନ୍ତୁ ଏଥିପାଇଁ ରାଜ୍ୟର ତାପମାତ୍ରାରେ କୌଣସି ପରିବର୍ତନ ଘଟିବ ନାହିଁ ବୋଲି ଅନୁମାନ କରାଯାଉଛି ।

ବିଶିଷ୍ଟ ପାଣିପାଗ ବିଶେଷଜ୍ଞ ସୁରେନ୍ଦ୍ରନାଥ ପଶୁପାଳକଙ୍କ ସୂଚନା ଅନୁଯାୟୀ, ଗତ ଦୁଇ ଦିନ ହେଲା ରାଜ୍ୟର ବିଭିନ୍ନ ସ୍ଥାନରେ ତାପମାତ୍ରା ବଢ଼ିବା ଆରମ୍ଭ କରିଛି। ଶୁକ୍ରବାରଠାରୁ ତାପମାତ୍ରା ବିଶେଷ ଭାବେ ବଢ଼ିବା ସହ ପାଗ ଶୁଖିଲା ରହିବ। ମୁଣ୍ଡ ଫଟା ଖରା ହେବ। ବାୟୁର ଆର୍ଦ୍ରତା କମ୍‌ ରହିବା ସହ ଗତି ମଧ୍ୟ କମ୍‌ ରହିବ। ଫଳରେ ସାରା ରାଜ୍ୟରେ ଗରମ ଅନୁଭୂତ ହେବ। ଆସନ୍ତା ୫ ତାରିଖ ପର୍ଯ୍ୟନ୍ତ ଗରମରୁ ନିସ୍ତାର ନାହିଁ ବୋଲି ସେ କହିଛନ୍ତି। ଶ୍ରୀ ପଶୁପାଳକଙ୍କ ଆକଳନ ଅନୁଯାୟୀ, ଭୁବନେଶ୍ୱର ସମେତ ଉପକୂଳ ଅଂଚଳରେ ୨୮ ତାରିଖ ସୁଦ୍ଧା ସର୍ବାଧିକ ତାପମାତ୍ରା ୩୮ ରୁ ୩୯ ଡିଗ୍ରି ରହିବ। ଏପ୍ରିଲ ୧ରୁ ୨ ତାରିଖ ଭିତରେ ତାପମାତ୍ରା ୪୦ରୁ ୪୧ ଡିଗ୍ରି ପର୍ଯ୍ୟନ୍ତ ରହିବ। ୩ ତାରିଖରେ ସାମାନ୍ୟ କମିବ। ରାତିର ସର୍ବନିମ୍ନ ତାପମାତ୍ରା ୨୮ରୁ ୩୦ ତାରିଖ ମଧ୍ୟରେ ୨ ଡିଗ୍ରି ବଢ଼ି ତା’ପରେ ଅପରିବର୍ତିତ ରହିବ। ବଲାଙ୍ଗୀର ସମେତ ପଶ୍ଚିମ ଓଡ଼ିଶାରେ ୨୯ ତାରିଖରୁ ତାପାମାତ୍ରା ଦ୍ରୁତ ଗତିରେ ବଢ଼ିବ। ୩୧ ତାରିଖରେ ୪୦ ଡିଗ୍ରି ଓ ଏପ୍ରିଲ ୨ ତାରିଖ ସୁଦ୍ଧା ତାପମାତ୍ରା ୪୧.୫ ଡିଗ୍ରିରେ ପହଂଚିବ ଓ ତା’ପରେ ଅପରିବର୍ତିତ ରହିବ। ସେହିଭଳି ଅନୁଗୁଳରେ ୨୮ ତାରଖ ସୁଦ୍ଧା ୩୯ରୁ ୪୦ ଡିଗ୍ରି ଓ ଏପ୍ରିଲ ୨ ତାରିଖ ସୁଦ୍ଧା ତାପମାତ୍ରା ୪୧ ଡିଗ୍ରିରୁ ଅଧିକ ରହିବ। ଝାରସୁଗୁଡ଼ା ସମେତ ଉତରପଶ୍ଚିମ ଓଡ଼ିଶାରେ ଗରମ ଅଧିକ ରହିବ।

ଅନୁମାନ କରାଯାଉଛି ଯେ, ଆସନ୍ତା ୩ ଦିନ ମଧ୍ୟରେ ରାଜ୍ୟର ଅଧିକାଂଶ‌ ସ୍ଥାନରେ ତାପମାତ୍ରା ପ୍ରାୟ ୩ ଡିଗ୍ରି ବଢ଼ିବ ଓ ତା’ପର ୪ ଦିନରେ ମଧ୍ୟ ଆହୁରି ୩ ଡିଗ୍ରି ପର୍ଯ୍ୟନ୍ତ ବଢ଼ିବାର ଆଶଙ୍କା ରହିଛି। ଫଳରେ ଏପ୍ରିଲ ୧ ଓ ୨ ସୁଦ୍ଧା ରାଜ୍ୟର ଅଧିକାଂଶ ସ୍ଥାନରେ ତାପମାତ୍ରା ୪୦ ଡିଗ୍ରିରୁ ଅଧିକ ରହିବ। ୩୦ ଓ ୩୧ରେ କେତେକ ସ୍ଥାନରେ ପାଗ ମେଘୁଆ ରହିବ। ଉପରବେଳା କାଳବୈଶାଖୀ ବର୍ଷା ହେବାର ସମ୍ଭାବନା ରହିଛି। ଗୋଟିଏ ଦୁଇଟି ସ୍ଥାନରେ ପବନ ସହ କୁଆପଥର ବର୍ଷା ହୋଇପାରେ ବୋଲି ଆକଳନ କରାଯାଉଛି।