ବିଶ୍ୱ ରେକର୍ଡ ସହ ଅଲିମ୍ପିକ୍‌ କୋଟା ହାସଲ କଲେ ସୌରଭ ଚୌଧୁରୀ

ନୂଆଦିଲ୍ଲୀ: ଭାରତୀୟ ଯୁବ ଶୁଟର୍‌ ସୌରଭ ଚୌଧୁରୀ ଦିଲ୍ଲୀସ୍ଥ କର୍ଣ୍ଣି ଶୁଟିଂ ରେଞ୍ଜ୍‌ରେ ଚାଲିଥିବା ଆଇଏସ୍ଏସ୍ଏଫ୍ ୱାର୍ଲ୍ଡ କପ୍‌ରେ ସ୍ୱର୍ଣ୍ଣ ପଦକ ହାସଲ କରିଛନ୍ତି। ଚଳିତ ବିଶ୍ୱକପ୍‌ରେ ଭାରତର ଏହା ଦ୍ୱିତୀୟ ସ୍ୱର୍ଣ୍ଣ ପଦକ। ୧୬ ବର୍ଷୀୟ ସୌରଭ ପୁରୁଷ ୧୦ ମିଟର ଏୟାର ପିସ୍ତଲ ଇଭେଣ୍ଟରେ ୨୪୫ ପଏଣ୍ଟ ସହ ବିଶ୍ୱ ରେକର୍ଡ ସ୍ଥାପନ କରି ଦେଶ ପାଇଁ ତୃତୀୟ ଅଲିମ୍ପିକ୍‌ କୋଟା ହାସଲ କରିଛନ୍ତି। ଏସିଆନ୍ ଗେମ୍ସ ସ୍ୱର୍ଣ୍ଣ ପଦକ ବିଜେତା ସୌରଭ ଉକ୍ତ ଇଭେଣ୍ଟର ଫାଇନାଲରେ ଲଗାତାର ଭଲ ପ୍ରଦର୍ଶନ କରି ସର୍ବିୟାର ଦାମିର ମିକେଚ୍‌ଙ୍କୁ ପଛରେ ପକାଇଥିଲେ। ଦାମିର ୨୩୯.୩ ପଏଣ୍ଟ ସହ ଦ୍ୱିତୀୟ ସ୍ଥାନ ହାସଲ କରି ରୌପ୍ୟ ପଦକ କବ୍‌ଜା କରିଥିବା ବେଳେ ଚୀନ୍‌ର ୱେଇ ପାଙ୍ଗ ୨୧୫.୨ ପଏଣ୍ଟ ସହ ବ୍ରୋଞ୍ଜ ପଦକ ହାସଲ କରିଛନ୍ତି। ୮ଜଣିଆ ପୁରୁଷଙ୍କ ମଧ୍ୟରେ ହୋଇଥିବା ଫାଇନାଲ୍‌ ମୁକାବିଲାରେ ସୌରଭ ଦବଦବା ବଜାୟ ରଖିଥିଲେ ଏବଂ ରୌପ୍ୟ ପଦକ ବିଜେତା ଶୁଟର୍‌ଙ୍କଠାରୁ ୫.୭ ପଏଣ୍ଟ ଆଗରେ ରହିଥିଲେ।