ଫାର୍ମାସୀ ବିଜ୍ଞାନ କ୍ଷେତ୍ରରେ ମିଳିତ ଗବେଷଣା ନିମନ୍ତେ ସୋଆ ଏବଂ ଯାଦବପୁର ବିଶ୍ୱବିଦ୍ୟାଳୟ ମଧ୍ୟରେ ଚୁକ୍ତି ସ୍ୱାକ୍ଷରିତ

ଭୁବନେଶ୍ୱର, : ଫାର୍ମାସୀ ବିଜ୍ଞାନର ବିଭିନ୍ନ କ୍ଷେତ୍ରରେ ମିଳିତ ଭାବେ ଶିକ୍ଷା ପ୍ରଦାନ ଏବଂ ଗବେଷଣା ନିମନ୍ତେ ଶିକ୍ଷା ଓ ଅନୁସନ୍ଧାନ (ସୋଆ) ଓ କୋଲ୍‌କାତା ସ୍ଥିତ ଯାଦବପୁର ବିଶ୍ୱବିଦ୍ୟାଳୟ ମଧ୍ୟରେ ଶୁକ୍ରବାର ଏକ ଚୁକ୍ତିପତ୍ର ସ୍ୱାକ୍ଷରିତ ହୋଇଯାଇଛି ।
ଏହି ଚୁକ୍ତିପତ୍ର ଅନୁଯାୟୀ ଦୁଇଟି ବିଶ୍ୱବିଦ୍ୟାଳୟର ଫ୍ୟାକଲ୍ଟି ଏବଂ ଛାତ୍ରଛାତ୍ରୀମାନେ ଫାର୍ମାସୀ ବିଜ୍ଞାନର ବିଭିନ୍ନ କ୍ଷେତ୍ର ଯଥା କ୍ଲିନିକାଲ୍ ରିସର୍ଚ୍ଚ, ମୋଲିକ୍ୟୁଲର ଫାର୍ମାକୋଲୋଜି, ଡ୍ରଗ୍ ଡିସ୍‌କଭରୀ, ହର୍ବାଲ୍ ନାନୋଟେକ୍ନୋଲୋଜି, ଟ୍ରାନ୍ସଲେସନାଲ୍ ମେଡିସିନ୍ ଏବଂ ଫର୍ମୁଲେସନ୍ ଡେଭେଲପ୍‌ମେଂଟ ଇତ୍ୟାଦିରେ ଶିକ୍ଷା ପ୍ରଦାନ ଓ ଗବେଷଣା ନିମନ୍ତେ କାର୍ଯ୍ୟ କରିବେ ।
ଏହି ଚୁକ୍ତିପତ୍ର ସୋଆର ଉପ-କୁଳପତି ତଥା ରେଜିଷ୍ଟ୍ରାର ପ୍ରଫେସର ବିଭୁତି ଭୂଷଣ ପ୍ରଧାନ ଏବଂ ଯାଦବପୁର ବିଶ୍ୱବିଦ୍ୟାଳୟର ପ୍ରଫେସର ପଲ୍ଲବ କାନ୍ତି ହାଲ୍‌ଦାରଙ୍କ ମଧ୍ୟରେ ସ୍ୱାକ୍ଷରିତ ହୋଇଛି ।
ଏହି ଅବସରରେ ପ୍ରଫେସର ପ୍ରଧାନ କହିଥିଲେ ଯେ ସୋଆ ଓ ଯାଦବପୁର ବିଶ୍ୱବିଦ୍ୟାଳୟ ମଧ୍ୟରେ ହୋଇଥିବା ଏହି ଚୁକ୍ତିପତ୍ର ଫାର୍ମାସୀ ଶିଳ୍ପ କ୍ଷେତ୍ରରେ ବୈଷୟିକ ଅଗ୍ରଗତି ନିମନ୍ତେ ସହାୟକ ହେବ ।
ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ସୋଆର ସ୍କୁଲ ଅଫ୍ ଫାର୍ମାସ୍ୟୁଟିକାଲ୍ ସାଇନ୍‌ସେସ୍‌ର ଫାର୍ମାସ୍ୟୁଟିକସ୍ ବିଭାଗର ପ୍ରଫେସର ଗୌତମ ରଥ, ଫାର୍ମାକୋଗ୍ନୋସି ବିଭାଗର ପ୍ରଫେସର ଗୌତମ ଘୋଷ, ଫାର୍ମାକୋଲୋଜି ବିଭାଗର ପ୍ରଫେସର ବିଶ୍ୱକାନ୍ତ କର, ଆଇଏମ୍‌ଏସ୍ ଆଣ୍ଡ ସମ୍ ହସ୍ପିଟାଲ୍‌ର ଡେପୁଟି ମେଡିକାଲ୍ ସୁପରିଟେଣ୍ଡେଂଟ ପ୍ରଫେସର ରାଜେଶ ଲେଙ୍କା ପ୍ରମୁଖ ଉପସ୍ଥିତ ଥିଲେ ।

#SOA SIGNS MOU WITH JADAVPUR UNIVERSITY FOR JOINT RESEARCH IN PHARMACEUTICAL SCIENCES