ମୁମ୍ବାଇ : ଦେଶର ସବୁଠୁ ବଡ଼ ବାଣିଜ୍ୟିକ ବ୍ୟାଙ୍କ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ ପକ୍ଷରୁ ସ୍ଥାୟୀ ଜମା ଉପରେ ଦିଆଯାଉଥିବା ସୁଧହାର ୪୦ ବେସିସ ପଏଂଟ ବା ୦.୪ ପ୍ରତିଶତ ପର୍ଯ୍ୟନ୍ତ ହ୍ରାସ କରାଯାଇଛି । ଏହି ନୂଆ ହାର ଆଜିଠାରୁ ଲାଗୁ ହୋଇଛି । କେବଳ ଏତିକି ନୁହେଁ, ୨ କୋଟିରୁ ଅଧିକ ପରିମାଣର ସ୍ଥାୟୀ ଜମା ଉପରେ ସୁଧହାର ୫୦ ବେସିସ ପଏଂଟ ବା ୦.୫ ପ୍ରତିଶତ ହ୍ରାସ କରାଯାଇଛି ।
ଏହି ହ୍ରାସ ପରେ ୫ବର୍ଷରୁ ୧୦ ବର୍ଷ ପର୍ଯ୍ୟନ୍ତ କରାଯାଉଥିବା ସ୍ଥାୟୀ ଜମା ଉପରେ ଦିଆଯାଉଥିବା ସୁଧହାର ୫.୪୦ ପ୍ରତିଶତକୁ ହ୍ରାସ ପାଇଛି, ଯାହାକି ପୂର୍ବରୁ ୫.୭୦ ପ୍ରତିଶତ ଥିଲା ।
ଏହାକୁ ମିଶାଇ ଷ୍ଟେଟ ବ୍ୟାଙ୍କ ଚଳିତ ମାସରେ ଦୁଇଥର ଜମା ସୁଧହାର କମାଇସାରିଲାଣି । ଗତ ମେ ୧୨ ତାରିଖରେ ମଧ୍ୟ ଷ୍ଟେଟ ବ୍ୟାଙ୍କ ପକ୍ଷରୁ ଜମାସୁଧହାର ୨୦ ବେସିସ ପଏଂଟ କମାଇଥିଲା । ସେହିପରି ବରିଷ୍ଠ ନାଗରିକମାନଙ୍କ ପାଇଁ ଉଦ୍ଦିଷ୍ଟ ଫିକ୍ସଡ ଜମା ସୁଧହାର ୬.୨୦ ପ୍ରତିଶତକୁ ହ୍ରାସ ପାଇଛି, ଯାହାକି ପୂର୍ବରୁ ୬.୫୦ ପ୍ରତିଶତ ଥିଲା ।
ରିଜର୍ଭ ବ୍ୟାଙ୍କ ପକ୍ଷରୁ ଗତ ସପ୍ତାହରେ ରେପୋ ଓ ରିଭର୍ସ ରେପୋ ହାର ହ୍ରାସ କରାଯାଇଥିଲା । ଏହା ପରେ ପ୍ରଥମ ବ୍ୟାଙ୍କଭାବେ ଏସବିଆଇ ନିଜର ଜମା ସୁଧହାର କମାଇଛି । ରେପୋ ହାରକୁ ୪୦ ବେସିସ ପଏଂଟ ହ୍ରାସ କରି ୪ ପ୍ରତିଶତ ରଖିଥିଲା ।