ଲଞ୍ଚ ହେଲା ଏସବିଆଇର ଇଏମଆଇ ଡେବିଟ୍ କାର୍ଡ

ନୂଆଦିଲ୍ଲୀ: ଦେଶର ସବୁଠୁ ବଡ଼ ବ୍ୟାଙ୍କ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ(ଏସବିଆଇ) ପାର୍ବଣ ଋତୁରେ ନିଜ ଗ୍ରାହକଙ୍କୁ ବଡ଼ ଉପହାର ଦେଇଛି। ଏହି ଫେଷ୍ଟିଭାଲ ସିଜିନରେ ଏସବିଆଇ ଗ୍ରାହକଙ୍କ ପାଇଁ ସପିଂ କରିବା ଆହୁରି ସହଜ ହୋଇଯିବ। କାରଣ ବ୍ୟାଙ୍କ ଏବେ ଡେବିଟ୍ କାର୍ଡ ଇଏମଆଇ ସୁବିଧା ଲଞ୍ଚ କରିଛି। ଏହି ସେବା ଜରିଆରେ ଗ୍ରାହକ ସର୍ବନିମ୍ନ ୬ ମାସରୁ ୧୮ ମାସ ଯାଏ ଇଏମଆଇ ଅବଧି ବିକଳ୍ପ ଚୟନ କରି ପାରିବେ। ଏସବିଆଇର ୩୦ କୋଟି ଡେବିଟ୍ କାର୍ଡ ବ୍ୟବହାରକାରୀ ଅଛନ୍ତି, ଏଥିରୁ ୪୫  ଲକ୍ଷ ଗ୍ରାହକ ଏହାର ଫାଇଦା ପାଇ ପାରିବେ। 

ଗ୍ରାହକ ୧୫୦୦ରୁ ଅଧିକ ସହରରେ ୪୦,୦୦୦ରୁ ଅଧିକ ବ୍ୟବସାୟୀ ଓ ଦୋକାନରୁ ନିଜ ମନ ପସନ୍ଦର ସାମଗ୍ରୀ କିଣି ପାରିବେ। ଏହି ସବୁ ଦୋକାନରେ ପାଇନ ଲ୍ୟାବ୍ସ ବ୍ରାଣ୍ଡେଡ୍  ପିଓଏସ ମେସିନ ଲାଗିଥିବ। 

ଏସବିଆଇ ଚେୟାରମ୍ୟାନ ରଜନୀଶ କୁମାର ଏହି ଅବସରରେ କହିଛନ୍ତି ଯେ, ଆମେ ନିଜ ଗ୍ରାହକଙ୍କ ପାଇଁ ଡେବିଟ୍ କାର୍ଡ ଇଏମଆଇ ଲଞ୍ଚ କରି ଖୁସି ଅନୁଭବ କରୁଛୁ, କାରଣ ପାର୍ବଣ ଋତୁରେ ଗ୍ରାହକଙ୍କୁ ସୁଖଦ କିଣାକିଣିର ଅନୁଭବ ମିଳିବ। ଡେବିଟ୍ କାର୍ଡ ଇଏମଆଇ ଜରିଆରେ ଗ୍ରାହକ ମାସିକ କିସ୍ତି  ଦେଇ ସାମଗ୍ରୀ କିଣିବା ସହଜ ହେବ। ବର୍ତ୍ତମାନ ପୂରା ଅର୍ଥ ନଦେଇ ବି ଗ୍ରାହକ ଦୋକାନରୁ ନିଜ ମନ ପସନ୍ଦର ସାମଗ୍ରୀ କିଣି ପାରିବେ। 

ଏହି ସେବା ଉପଯୋଗ କରିବା ସମୟରେ ଗ୍ରାହକଙ୍କୁ କୌଣସି କାଗଜପତ୍ର, କୌଣସି ପ୍ରୋସେସିଂ ଫିସ, ଶାଖାକୁ ଯିବାକୁ ପଡ଼ିବ ନାହିଁ। କିଣାକିଣି ପୂରା  ହେବାର ଗୋଟିଏ ମାସ ପରେ ଇଏମଆଇ ଆରମ୍ଭ ହୋଇଯିବ।