ରଜନୀକାନ୍ତ ଲଢ଼ିବେନି ଲୋକସଭା ନିର୍ବାଚନ

ନୂଆଦିଲ୍ଲୀ: ଅଭିନେତାରୁ ରାଜନେତା ହୋଇଥିବା ରଜନୀକାନ୍ତ ଆଗାମୀ ଲୋକସଭା ନିର୍ବାଚନ ଲଢ଼ିବେ ନାହିଁ ବୋଲି ରବିବାର ଘୋଷଣା କରିଛନ୍ତି। ରଜନୀକାନ୍ତ ସ୍ପଷ୍ଟ ଭାବେ କହିଛନ୍ତି,“ମୁଁ କାହାକୁ ସମର୍ଥନ କରୁ ନାହିଁ। କୌଣସି ଦଳ ମୋ ଫଟୋ ଅବା ମୋ ସଂଗଠନର ଚିହ୍ନ ବ୍ୟବହାର କରିବା ଉଚିତ୍ ନୁହେଁ।” ସେ କହିଛନ୍ତି,“ଆଗାମୀ ସାଧାରଣ ନିର୍ବାଚନ ପାଇଁ ମୋ ଦଳ କୌଣସି ଦଳକୁ ସମର୍ଥନ କରୁ ନାହିଁ। ତେଣୁ କେହି ମୋ ଫଟୋ ଅବା ମୋ ସଂଗଠନର ପତାକା ବ୍ୟବହାର କରିବା ଉଚିତ୍ ନୁହେଁ। ସେହିପରି କୌଣସି ଦଳ ପ୍ରଚାର ପାଇଁ ରଜନୀ ଫ୍ୟାନ୍ କ୍ଲବ୍‌କୁ ବ୍ୟବହାର କରିବା ଉଚିତ୍ ନୁହେଁ।” ରଜନୀକାନ୍ତ ତାଙ୍କ ରାଜ୍ୟବାସୀଙ୍କ ଉଦ୍ଦେଶ୍ୟରେ କହିଛନ୍ତି ଯେ ଯେଉଁ ଦଳ ପାଣି ସମସ୍ୟାର ସମାଧାନ କରିପାରିବ, ସେହି ଦଳକୁ କେନ୍ଦ୍ରରେ କ୍ଷମତାକୁ ଆଣ। ୨୦୧୭ ମସିହା ଡିସେମ୍ବର ୩୧ ତାରିଖରେ ରଜନୀକାନ୍ତ ରାଜନୀତିରେ ପ୍ରବେଶ କରିଥିଲେ। ସେହିଦିନଠାରୁ ସେ କେଉଁ ଦଳ ସହିତ ମେଣ୍ଟ କରିବେ, ସେ ନେଇ ଚର୍ଚ୍ଚା ହୋଇ ଆସୁଥିଲା। ତେବେ ଆଜି ସେ ଏହି ଚର୍ଚ୍ଚାରେ ପୂର୍ଣ୍ଣଛେଦ ପକାଇଛନ୍ତି।