ଦଶପଲ୍ଲା: ଜେଲରେ ବିଧବା ହେଲେ ମହିଳା । ତେବେ ଏଭଳି ଘଟଣା ଘଟିଛି ନୟାଗଡ ଜିଲ୍ଲାର ଦଶପଲ୍ଲା ଉପକାରାଗାରରେ । ଉପକାରାଗାରରେ ଜଣେ ବିଚାରାଧୀନ କଏଦୀର ମୃତ୍ୟୁ ଘଟିଛି । ଯାହା ଫଳରେ ଉପକାରାଗାରରେ ଥିବା ମୃତକଙ୍କ ସ୍ତ୍ରୀ ବିଧବା ହୋଇଛନ୍ତି ।
ମୃତକଙ୍କ ନାଁ କୃଷ୍ଣଚନ୍ଦ୍ର ପାତ୍ର। ତାଙ୍କର ବୟସ ୪୫ ବର୍ଷ ଏବଂ ତାଙ୍କ ଘର ଦଶପଲ୍ଲା ବ୍ଲକ୍ ଅନ୍ତର୍ଗତ ବାଣିଗୋଛା ଗାଁରେ ବୋଲି ଜଣାଯାଇଛି। ମିଳିଥିବା ସୂଚନା ଅନୁଯାୟୀ, ଗତକାଲି ରାତିରେ କୃଷ୍ଣଚନ୍ଦ୍ର ପେଟରେ ଯନ୍ତ୍ରଣା ଅନୁଭବ କରିଥିଲେ। ଅବସ୍ଥା ଗୁରୁତର ହେବାରୁ ଉପ କାରାଗାର କର୍ତୃପକ୍ଷ ତାଙ୍କୁ ଦଶପଲ୍ଲା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତି କରିଥିଲେ। ରାତିରେ ସୁସ୍ଥ ହେବା ପରେ ତାଙ୍କୁ ଉପ କାରାଗାରକୁ ଅଣାଯାଇଥିଲା।
ହେଲେ ପୁଣି ଭୋର ସମୟରେ ଅସୁସ୍ଥ ହେବାରୁ କରି କୃଷ୍ଣଚନ୍ଦ୍ରଙ୍କୁ ଦଶପଲ୍ଲା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନିଆଯାଇଥିଲା। ସେଠାରେ ଡାକ୍ତର ତାଙ୍କର ଚିକିତ୍ସା କରୁଥିବା ବେଳେ କୃଷ୍ଣଚନ୍ଦ୍ର ଟଳି ପଡ଼ିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଖବର ପାଇ ଦଶପଲ୍ଲା ପୋଲିସ ଓ ତହସିଲଦାର ଡାକ୍ତରଖାନାରେ ପହଂଚି ଘଟଣାର ତଦନ୍ତ କରିଥିବା ଜଣାଯାଇଛି।
ସୂଚନାଯୋଗ୍ୟ, ପ୍ରାୟ ଚାରି ମାସ ହେବ କୃଷ୍ଣଚନ୍ଦ୍ର ପାତ୍ର ଓ ତାଙ୍କ ସ୍ତ୍ରୀ ପ୍ରଭାସିନୀ ଜେଲରେ ଅଛନ୍ତି। ସେ ଦୁହେଁ କୃଷ୍ଣଚନ୍ଦ୍ରଙ୍କ ମାଆ କୁମୁଦିନୀ ପାତ୍ରଙ୍କୁ ମରଣାନ୍ତକ ଆକ୍ରମଣ କରିଥିଲେ। ଏନେଇ କୁମୁଦିନୀ ଥାନାରେ ଏତଲା ଦେବା ପରେ ପୋଲିସ କୃଷ୍ଣ ଚନ୍ଦ୍ର ଓ ତାଙ୍କ ସ୍ତ୍ରୀ ପ୍ରଭାସିନୀଙ୍କୁ ଗିରଫ କରିଥିଲା। ଏହାପରେ ଉଭୟ ପତି ପତ୍ନୀ ଦଶପଲ୍ଲାରେ ଥିବା ଉପ କାରାଗାରରେ ରହୁଥିଲେ।