ଭୁବନେଶ୍ୱର : ଗଡ଼ିବ ପାର୍ସଲ ଟ୍ରେନ୍ । ୨୧ ଦିନିଆ ଲକ୍ ଡାଉନ୍ ସମୟରେ ଅତ୍ୟାବଶ୍ୟକୀୟ ସାମଗ୍ରୀ ଯୋଗାଇବ ଏହି ଟ୍ରେନ୍ । ତେବେ ଅତ୍ୟାବଶ୍ୟକୀୟ ସାମଗ୍ରୀ ପରିବହନ ଉପରେ ଭାରତୀୟ ରେଳପଥ ଗୁରୁତ୍ୱ ପ୍ରଦାନ କରିଛି। ମେଡିକାଲ ପାଇଁ ଆବଶ୍ୟକୀୟ ଉପକରଣ, ଖାଦ୍ୟ ସାମଗ୍ରୀ ଆଦି ପରିବହନ ଯେପରି ସୁନିଶ୍ଚିତ ହୋଇପାରିବ, ସେଥିପାଇଁ ପ୍ରାଥମିକତା ଦିଆଯାଉଛି।
ଏହାକୁ ଦୃଷ୍ଟିରେ ରଖି ପୂର୍ବତଟ ରେଳପଥ ପକ୍ଷରୁ ଅତ୍ୟାବଶ୍ୟକ ସାମଗ୍ରୀ ପରିବହନ ପାଇଁ ସ୍ୱତନ୍ତ୍ର ପାର୍ସଲ ଟ୍ରେନ୍ ଚଲାଇବାକୁ ନିଷ୍ପତି ନିଆଯାଇଛି। ଏହି ସେବା ପାଇବା ଲାଗି ବ୍ୟାବସାୟିକ ପ୍ରତିଷ୍ଠାନ ଓ ବେପାରୀମାନେ ପୂର୍ବତଟ ରେଳପଥ ସହ ଯୋଗାଯୋଗ କରିବାକୁ କୁହାଯାଇଛି।
ସେହିପରି ପଶ୍ଚିମତଟ ରେଳପଥ ପକ୍ଷରୁ ଅହମ୍ମଦାବାଦର କଙ୍କରିଆରୁ କଟକକୁ ଏକ ସ୍ୱତନ୍ତ୍ର ପାର୍ସଲ ଏକ୍ସପ୍ରେସ୍ ଚଳାଇବାକୁ ସମୟ ଧାର୍ଯ୍ୟ ହୋଇଛି। ଯେଉଁଥିରେ ଦୁଗ୍ଧ ଉତ୍ପାଦକ ସାମଗ୍ରୀ, ଖାଇବା ତେଲ, ମସଲା, ବିସ୍କୁଟ ଆଦି ପରିବହନ ହେବ। ଏହାବ୍ୟତୀତ ଆଉ କିଛି ପାର୍ସଲ କାର୍ଗୋ ଟ୍ରେନ୍ ଚଳାଚଳ କରିବାକୁ ଆଲୋଚନା ହେଉଛି। ତେବେ ଟ୍ରକ୍ ଓ ଶ୍ରମିକଙ୍କ ଚଳପ୍ରଚଳ ଲାଗି ସ୍ଥାନୀୟ ପ୍ରଶାସନର ଅନୁମତି ମିଳିବା ପରେ ଏ ବିଷୟରେ ଚୂଡ଼ାନ୍ତ ନିଷ୍ପତି ନିଆଯିବ।
କୌଣସି ସ୍ଥାନକୁ ଅତ୍ୟାବଶ୍ୟକ ସାମଗ୍ରୀ ପରିବହନ ଲାଗି ଇଚ୍ଛୁକ ବ୍ୟବସାୟିକ ପ୍ରତିଷ୍ଠାନ, ବେପାରୀ, ସ୍ୱଚ୍ଛାସେବୀ ସଙ୍ଗଠନ ଏନେଇ ପୂର୍ବତଟ ରେଳପଥର ଅଧିକାରୀମାନଙ୍କ ସହ ଯୋଗାଯୋଗ କରିପାରିବେ ବୋଲି ପୂର୍ବତଟ ରେଳପଥ ପକ୍ଷରୁ କୁହାଯାଇଛି।