ଭୁବନେଶ୍ୱର :ରାଜ୍ୟର ଗ୍ରାମାଂଚଳର ବିକାଶ ପାଇଁ ପଂଚାୟତରାଜ ବ୍ୟବସ୍ଥା ଆରମ୍ଭ କରାଯାଇଥିଲା । ୟୁପିଏ ସରକାରଙ୍କ ଅମଳରେ ୨୦୧୪ ମସିହାପୂର୍ବରୁ ୧୩ଦଶ ଅର୍ଥ କମିଶନ ସୁପାରିଶ ଆଧାରରେ ପ୍ରତିଟି ପଂଚାୟତର ବିକାଶ ପାଇଁ ପ୍ରତି ବର୍ଷ ମାତ୍ର ୧ରୁ ୫ ଲକ୍ଷ ଟଙ୍କା ମିଳୁଥିଲା । ମାତ୍ର ଗରୀବଙ୍କ ପାଇଁ ସଚ୍ଛମର୍ପିତ ମୋଦି ସରକାର ୨୦୧୫ ମସିହାଠାରୁ ୧୪ର୍ଦ୍ଦଶ ଅର୍ଥ କମିଶନଙ୍କ ସୁପାରିଶ ଆଧାରରେ ପ୍ରତି ପଂଚାୟତକୁ ପ୍ରତି ବର୍ଷ ସର୍ବନିମ୍ନ ୪୦ଲକ୍ଷ ଟଙ୍କାରୁ ସର୍ବାଧିକ ୧ କୋଟି ଟଙ୍କା ପ୍ରଦାନ କରିଛନ୍ତି । ଏହି ଅର୍ଥରେ ସ୍ଥାନୀୟ ପଂଚାୟତର ଉଜ୍ଜ୍ୱଳା ବ୍ୟବସ୍ଥା, ପରିମଳ ବ୍ୟବସ୍ଥା, ମାର୍କେଟ କଂପ୍ଲେକ୍ସ ଆଦି ନିର୍ମାଣ କରାଯାଇ ପଂଚାୟତର ନିଜସ୍ୱ ଆର୍ଥିକ ବ୍ୟବସ୍ଥାକୁ ସୁଦୃଢ କରାଯାଇପାରିବ । ପ୍ରତିଟି ପଂଚାୟତର ବିକାଶ ପାଇଁ ମୋଦି ସରକାର ପ୍ରଚୁର ପରିମାଣରେ ଅର୍ଥ ପଠାଉଛନ୍ତି । ମାତ୍ର ରାଜ୍ୟ ସରକାରଙ୍କ ତୃଟିପୂର୍ଣ୍ଣ ନୀତି କାରଣରୁ ଅର୍ଥ ବିନିଯୋଗ ହୋଇନପାରି କେନ୍ଦ୍ରକୁ ପୁଣି ଫେରିଯାଉଛି । ଗତ ୬ ବର୍ଷରେ ରାଜ୍ୟର ଗ୍ରାମାଂଚଳରେ ଯାହା କିଛି ବିକାଶ ହୋଇଛି, ତାହା କେବଳ ମୋଦି ସରକାରଙ୍କ ଅର୍ଥରେ ହୋଇଛି । ମୋଦିଙ୍କ ଲାଇଟ ଗାଁ ଦାଣ୍ଡକୁ ଉଜ୍ଜଳ କରିଛି । ମାତ୍ର ଅନ୍ୟ ପଟେ ରାଜ୍ୟର ଅର୍ଦ୍ଧାଧିକ ପଂଚାୟତରେ ନିର୍ବାହୀ ଅଧିକାରୀ ପଦବୀ ଖାଲି ପଡିଛି । ବ୍ଲକରେ ଜେଇ ଓ ଆପିଓ କର୍ମଚାରୀ ପଦବୀ ଖାଲି ପଡିଛି । ତେଣୁ ଯେଉଁ କାମ ହେଉଛି, ତାହା ମଧ୍ୟ ଅତି ନିମ୍ନ ମାନର । ମୋଦି ପଠାଇଥିବା ଅର୍ଥ ପଂଚାୟତରେ ଅଛି, ମାତ୍ର ଖର୍ଚ୍ଚ ହୋଇପାରୁନାହିଁ । “ସଉଦା ଅଛି, ମାତ୍ର ରୋଷେଇଆ ନାହିଁ” ବୋଲି କହି ପଞ୍ଚାୟତିରାଜ ଦିବସରେ ରାଜ୍ୟ ସରକାରଙ୍କୁ ତାତ୍ସଲ୍ୟ କରିଛନ୍ତି ବିଜେପି ରାଜ୍ୟ ସଭାପତି ସମୀର ମହାନ୍ତି । ଶୁକ୍ରବାର ରାଜ୍ୟ କାର୍ଯ୍ୟାଳୟରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଶ୍ରୀ ମହାନ୍ତି କହିଛନ୍ତି ଯେ, ରାଜ୍ୟର ୫୦ରୁ ଉର୍ଦ୍ଧ୍ୱ ବିଧାନସଭା କ୍ଷେତ୍ରର ବିଭିନ୍ନ ଗ୍ରାମ ଗସ୍ତ କରି ବିକାଶର ବାସ୍ତବ ଚିତ୍ର ଦେଖିଲା ପରେ ଗ୍ରାମାଂଚଳର ବିକାଶରେ ରାଜ୍ୟ ସରକାର ବାଧକ ସାଜିଥିବା ସ୍ପଷ୍ଟ ଜଣାପଡିଛି ବୋଲି କହିଛନ୍ତି । ଆଦିବାସୀ ଅଞ୍ଚଳରେ ରାଜ୍ୟର ଜନଜାତିଙ୍କୁ ଆର୍ଥିକ ସ୍ୱଚ୍ଛଳତା ପାଇଁ ଅମୋଘ ଅସ୍ତ୍ର ଭାବେ ‘ପ୍ରଧାନମନ୍ତ୍ରୀ ବନଧନ ଯୋଜନା’ କାର୍ଯ୍ୟକାରୀ କରାଯାଇଛି । ‘ଆତ୍ମନିର୍ଭରଶୀଳ ଭାରତ ଗଠନ’, ‘ପ୍ରଧାନମନ୍ତ୍ରୀ ବନଧନ ଯୋଜନା’ ଓ ‘ଭୋକାଲ ଫର ଲୋକାଲ’ ଦ୍ୱାରା ଆଦିବାସୀ ଅଂଚଳର ପ୍ରମୁଖ ଉତ୍ପାଦ ଭାବେ ପରିଗଣିତ ବିଶ୍ୱବିଖ୍ୟାତ ହଳଦୀ, ଝୁଣା, ମହୁ, ଶାଳମଞ୍ଜି, ଆମ୍ବ, ସପୁରୀ, କପା, ମହୁଲ ଆଦି ବନଜାତ ଦ୍ରବ୍ୟ ଆନ୍ତର୍ଜାତୀୟ ସ୍ତରରେ ଅତି ସହଜରେ ଉପଲବ୍ଧ ହେବା ସହ ସେମାନଙ୍କ ଆର୍ଥୀକ ଅଭିବୃଦ୍ଧିରେ ବିଶେଷ ସହାୟକ ହୋଇପାରିବ । ଏହି ସମସ୍ତ ଲଘୁଜାତ ବନ୍ୟଜାତ ଦ୍ରବ୍ୟର ସଂଗ୍ରହ, ପ୍ରୋସେସିଂ, ମାର୍କେଟିଂ ଆଦି ପାଇଁ କେନ୍ଦ୍ର ସରକାର ପ୍ରଚୁର ମାତ୍ରାରେ ଅର୍ଥ ପ୍ରଦାନ କରୁଛନ୍ତି । ମାତ୍ର ରାଜ୍ୟ ସରକାର ଓ ପ୍ରଶାସନର ଆନ୍ତରିକତାର ଅଭାବ କାରଣରୁ ପ୍ରଧାନମନ୍ତ୍ରୀ ବନଧନ ଯୋଜନାର କାର୍ଯ୍ୟକାରୀ କରାଇବାରେ ବିଫଳ ହୋଇଛନ୍ତି । ମହିଳା ସଶକ୍ତିକରଣ କହୁଥିବା ରାଜ୍ୟ ସରକାର ମୋଦିଙ୍କ ବନଧନ ଯୋଜନାକୁ କାର୍ଯ୍ୟକାରୀ ନକରାଇ ଜନଜାତି ମହିଳାଙ୍କୁ ସ୍ୱରୋଜଗାରକ୍ଷମ କରିବାରେ ବଡ ବାଧକ ସାଜିଛନ୍ତି । ମୋଦି ସରକାର ୬୪ଟି ଲଘୁଜାତ ବନ ଦ୍ରବ୍ୟର ସର୍ବନିମ୍ନ ସହାୟକ ମୂଲ୍ୟ ନିର୍ଦ୍ଧାରଣ କରିଛନ୍ତି । ମାତ୍ର ରାଜ୍ୟ ସରକାରଙ୍କ ନିଷ୍କ୍ରିୟତା ଓ ଭୂଲ ନୀତି ଯୋଗୁଁ ଲୋକଙ୍କ ହାତକୁ ଟଙ୍କା ଆସୁନାହିଁ । ପଂଚାୟତରାଜ ବ୍ୟବସ୍ଥା ବିଫଳତାର ବାସ୍ତବ ଚିତ୍ର ଜଳଜଳ ହୋଇ ଦେଖାଯାଉଛି ବୋଲି ଶ୍ରୀ ମହାନ୍ତି କହିଛନ୍ତି ।
କେନ୍ଦ୍ରରୁ ଆସୁଥିବା ଅର୍ଥକୁ ସଠିକ ଭାବେ ବ୍ୟବହାର କରିବା ସହ ରାଜ୍ୟ ସରକାର ନିଜସ୍ୱ ପାଂଠିରୁ ଅର୍ଥ ଖର୍ଚ୍ଚ କରି ଗ୍ରାମାଂଚଳରେ ବିକାଶ କାର୍ଯ୍ୟକୁ ତ୍ୱରାନ୍ୱିତ କରିବା ସହ ପ୍ରତ୍ୟେକ ଗ୍ରାମକୁ ଆତ୍ମନିର୍ଭରଶୀଲ କରିବାରେ ବଳିଷ୍ଠ ପଦକ୍ଷେପ ନେବାକୁ ଶ୍ରୀ ମହାନ୍ତି ପରାମର୍ଶ ଦେଇଛନ୍ତି ।
