ଯାଜପୁର: କୋରୋନା ମୁକାବିଲା ପାଇଁ ରାଜ୍ୟ ସରକାର ସ୍ୱତନ୍ତ୍ର ପାଣ୍ଠି ଗଠନ କରିଛନ୍ତି । ଏହି ପାଣ୍ଠିକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୩ମାସର ଦରମା ପ୍ରଦାନ କରିଥିବାବେଳେ ଆଜି ଯାଜପୁର ବିଧାୟକ ପ୍ରଣବ ପ୍ରକାଶ ଦାସ ୨୦୨୦-୨୧ ଆର୍ଥିକ ବର୍ଷର ସମସ୍ତ ଏମଏଲଏ ଲାଡ୍ ପାଣ୍ଠିକୁ କୋରୋନା ମୁକାବିଲା ପାଇଁ ମୁଖ୍ୟମନ୍ତ୍ରୀ ରିଲିଫ ପାଣ୍ଠିକୁ ଦାନ କରିଛନ୍ତି । ଏନେଇ ଟ୍ୱିଟ କରି ଜଣାଇଛନ୍ତି ।
Wrote to @JajpurAdmn pledging my entire MLA-LAD fund of 2020-21 towards fighting #Covid19 in my constituency. Every life is precious and every bit counts.#CoronaVirusLockdown #OdishaFightCorona
— Pranab Prakash Das (@pranabpdas) March 25, 2020
ସୂଚନାଯୋଗ୍ୟ, ପୂର୍ବରୁ ବାଚସ୍ପତି ସୂର୍ଯ୍ୟନାରାୟଣ ପାତ୍ର, ମନ୍ତ୍ରୀ ରଘୁନନ୍ଦନା ଦାସଙ୍କ ସମେତ ୧୬ ଜଣ ବିଧାୟକ ସେମାନଙ୍କର ୩ ମାସର ଦରମା ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ପ୍ରଦାନ କରିଛନ୍ତି।
ରିଲିଫ୍ ପାଣ୍ଠିକୁ ଦରମା ପ୍ରଦାନ କରିଥିବା ବିଧାୟକ ଓ ବିଧାୟିକାମାନଙ୍କ ଭିତରେ ସରକାରୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ, ବିଧାୟକ ଅତନୁ ସବ୍ୟସାଚୀ ନାୟକ, ପ୍ରଶାନ୍ତ କୁମାର ଜଗଦ୍ଦେବ, ସୁଶାନ୍ତ କୁମାର ରାଉତ, ପ୍ରଣବ ପ୍ରକାଶ ଦାସ, ଦେବୀ ପ୍ରସାଦ ମିଶ୍ର, ଧ୍ରୁବ ଚରଣ ସାହୁ, ଭାଗିରଥୀ ସେଠୀ, ଶଶିଭୁଷଣ ବେହେରା, ପ୍ରଶାନ୍ତ ମୁଦୁଲି, ଶାରଦା ପ୍ରସାଦ ନାୟକ, ସୁବ୍ରତ ତରାଇ, ଭବାନୀ ଶଙ୍କର ଭୋଇ, ସଞ୍ଜୀବ କୁମାର ମଲ୍ଲିକ, ବିଧାୟିକା ସାବିତ୍ରୀ ଅଗ୍ରୱାଲ ଓ ଲତିକା ପ୍ରଧାନ ସାମିଲ ଅଛନ୍ତି।
କୋରୋନା ରୋଗର ସଫଳ ମୁକାବିଲା ପାଇଁ ମୁଖ୍ୟମନ୍ତ୍ରୀ ଯେଭଳି ପଦକ୍ଷେପ ନେଇଛନ୍ତି, ତାକୁ ବାଚସ୍ପତି ଶ୍ରୀ ପାତ୍ର ପ୍ରଶଂସା କରିଛନ୍ତି। ଏହି ଦୁଃସମୟରେ ପ୍ରଭାବିତ ଲୋକମାନଙ୍କ ସହାୟତା ପାଇଁ ମନ୍ତ୍ରୀ ପରିଷଦର ସଦସ୍ୟ ଓ ସଦସ୍ୟାଙ୍କ ସମେତ ସବୁ ଦଳର ବିଧାୟକମାନଙ୍କୁ ସେମାନଙ୍କର ଦରମା ପ୍ରଦାନ କରିବାକୁ ସେ ଅନୁରୋଧ କରିଛନ୍ତି।
ଏଣେ କୋରୋନା ପାଇଁ ସାରା ରାଜ୍ୟରେ ତାଲା ବନ୍ଦ ଯୋଗୁଁ ଗରିବ, ଖଟିକିଆଙ୍କ ରୋଜଗାର ବନ୍ଦ ହେବା ନେଇ ଚିନ୍ତା ପ୍ରକଟ କରିଛନ୍ତି ପୂର୍ବତନ ମନ୍ତ୍ରୀ ତଥା ପିସିସି ସଭାପତି ନିରଞ୍ଜନ ପଟ୍ଟନାୟକ। ଏହାସହିତ ବିଧାନସଭାର ଜଣେ ପୂର୍ବତନ ସଦସ୍ୟଭାବେ ସେ ତାଙ୍କର ଗୋଟିଏ ମାସର ପେନ୍ସନ୍ ଅର୍ଥ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି।