ଅସ୍ତ୍ରୋପଚାରବେଳେ ମହିଳାଙ୍କର ମୃତ୍ୟୁ

ଡାକ୍ତରଙ୍କ ଅବହେଳା ନେଇ ଥାନାରେ ଅଭିଯୋଗ

ଭଦ୍ରକ: ଭଦ୍ରକ ସହରର ମୋଟେଲ ଛକ ନିକଟରେ ଥିବା ଏକ ଘରୋଇ ନର୍ସିଂହୋମରେ ଡାକ୍ତରଙ୍କ ଅବହେଳା କାରଣରୁ ଜଣେ ବିବାହିତା ମହିଳାଙ୍କର ମୃତ୍ୟୁ ଅଭିଯୋଗ ହୋଇଛି।

ମିଳିଥିବା ସୂଚନା ଅନୁଯାୟୀ, ଭଦ୍ରକର ସହରର ମୋଟେଲ ଛକ ନିକଟରେ ଥିବା ଘରୋଇ ନର୍ସିଂହୋମ କାଳନ୍ଦୀ ହସ୍ପିଟାଲରେ ଯାଜପୁର ଜିଲ୍ଲା ଅନ୍ତର୍ଗତ କୋଥଳା ଗାଁର ସ୍ବର୍ଣ୍ଣଲତା ମହାପାତ୍ର ଗତ ପ୍ରାୟ ୧ ବର୍ଷ ହେବ ବାହା ହୋଇଥିଲେ ବି ତାଙ୍କର କୌଣସି ସନ୍ତାନ ସନ୍ତତି ହେଉନଥିଲା। ଏଥିଲାଗି ସେ ଡାକ୍ତରଙ୍କ ପରାମର୍ଶ ନେଇ ଉକ୍ତ ଘରୋଇ ହସ୍ପିଟାଲରେ ନିଜର ଅସ୍ତ୍ରୋପଚାର ଲାଗି ଆସିଥିଲେ ସ୍ବର୍ଣ୍ଣଲତା । ହେଲେ ଗତକାଲି ରାତି ପ୍ରାୟ ସାଢ଼େ ୧୧ଟା ବେଳକୁ ଅସ୍ତ୍ରୋପଚାର ସମୟରେ ସେ ମୃତ୍ୟୁବରଣ କରିଥିଲେ।

ଏହି ମୃତ୍ୟୁ ଘଟଣାକୁ ନେଇ ସ୍ବର୍ଣ୍ଣଲତାଙ୍କ ସମ୍ପର୍କୀୟମାନେ ନର୍ସିଂହୋମରେ ପାଟିତୁଣ୍ଡ କରିଥିଲେ। ଆଜି ସକାଳେ ଡାକ୍ତରଙ୍କ ଅବହେଳା ଯୋଗୁଁ ଏଭଳି ଘଟଣା ଘଟିଛି ବୋଲି ପରିବାର ଲୋକେ ଅଭିଯୋଗ ଆଣି ଭଦ୍ରକ ଟାଉନ୍ ଥାନାରେ ଏତଲା ଦେଇଥିଲେ । ଟାଉନ୍ ଥାନାରେ ସମ୍ପର୍କୀୟଙ୍କ ଲିଖିତ ଅଭିଯୋଗ ପାଇବା ପରେ ପୁଲିସ ଘଟଣାର ତଦନ୍ତ ଆରମ୍ଭ କରିଥିବା ଜଣାଯାଇଛି।