ଆଜି ସନ୍ଧ୍ୟାରେ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଭାବେ ଶପଥ ନେବେ ଶିବରାଜ ସିଂ ଚୌହାନ

ଭୋପାଳ: ମଧ୍ୟପ୍ରଦେଶ ରାଜନୈତିକ ଡ୍ରାମାରେ ପଡିଛି ପୂର୍ଣ୍ଣଛେଦ । ଆଜି ସନ୍ଧ୍ୟାରେ ଚତୁର୍ଥ ଥର ପାଇଁ ମୁଖ୍ୟମନ୍ତ୍ରୀ ପଦ ଭାବେ ଶପଥ ନେବେ ଶିବରାଜ ସିଂ ଚୌହାନ । ଏ ନେଇ ବିଶେଷ ଖବର ସୂତ୍ରରୁ ସୂଚନା ମିଳିଥିବା ଜଣାପଡିଛି ।

ଉଲ୍ଲେଖଯୋଗ୍ୟ କଂଗ୍ରେସର ଅନ୍ୟତମ ବରିଷ୍ଠ ନେତା ଜ୍ୟୋତିରାଦିତ୍ୟ ସିନ୍ଧିଆ ଦଳର କାର୍ଯ୍ୟ ଏବଂ ବିଶେଷ କରି କଂଗ୍ରେସ ମୁଖ୍ୟମନ୍ତ୍ରୀ କମଲନାଥଙ୍କ କାର୍ଯ୍ୟକଳାପରେ ଅସନ୍ତୋଷ ବ୍ୟକ୍ତ କରି କଂଗ୍ରେସରୁ ଇସ୍ତଫା ଦେଇ ବିଜେପିରେ ଯୋଗ ଦେଇଥିଲେ। ପରେ ପରେ ଜ୍ୟୋତିରାଦିତ୍ୟ ସିନ୍ଧିଆଙ୍କୁ ସମର୍ଥନ ଜଣାଇ ମଧ୍ୟପ୍ରଦେଶ ବିଧାନସଭାରେ ତାଙ୍କ ସମର୍ଥକ ରହିଥିବା ୨୨ ଜଣ ବିଧାୟକ ମଧ୍ୟ କଂଗ୍ରେସରୁ ଇସ୍ତଫା ଦେଇ ଦେଇଥିଲେ। ଏବଂ ବିଜେପିରେ ଯୋଗ ଦେଇଥିଲେ। ଫଳରେ କମଲନାଥଙ୍କ ସରକାର ବିଧାନସଭାରେ ନିଜର ସଂଖ୍ୟା ଗରିଷ୍ଠତା ହରାଇଥିଲା। ଏବଂ ସୁପ୍ରିମ୍‌ କୋର୍ଟଙ୍କ ନିର୍ଦ୍ଦେଶ କ୍ରମେ ବିଧାନସଭାରେ ଆସ୍ଥା ଭୋଟର ସମ୍ମୁଖୀନ ହେବା ପୂର୍ବରୁ କମଲନାଥ ଗୁରୁବାର ନିଜ ପଦବୀରୁ ଇସ୍ତଫା ଦେଇଥିଲେ। ଫଳରେ ବିଜେପି ପାଇଁ ରାଜ୍ୟରେ ସରକାର ଗଠନ ପାଇଁ ପଥ ଉନ୍ମୁକ୍ତ ହୋଇ ଯାଇଥିଲା।