୪ ସରକାରୀ ହୋମିଓପ୍ୟାଥି କଲେଜରେ ଖାଲି ପଡ଼ିଛି ଅଧ୍ୟାପକ ପଦ

ଭୁବନେଶ୍ବର : ରାଜ୍ୟରେ ଥିବା ୪ ସରକାରୀ ହୋମିଓପ୍ୟାଥି କଲେଜରେ ଦୀର୍ଘ ଦିନ ଧରି ଅଧ୍ୟାପକ ପଦ ଖାଲି ପଡ଼ିଛି। ସ୍ବାସ୍ଥ୍ୟ ବିଭାଗର ଉଦାସୀନତା କାରଣରୁ ଏସବୁ ପଦ ପୂରଣ ହୋଇପାରୁ ନାହିଁ। ଅପରପକ୍ଷରେ ବିଭିନ୍ନ ଡାକ୍ତରଖାନାରୁ ଡେପୁଟେସନ୍‌ରେ ପଢ଼ାଇବାକୁ ଆସିଥିବା ଡାକ୍ତର ବର୍ଷ ବର୍ଷ ଧରି ଏହି କଲେଜରେ ରହିଛନ୍ତି। ଫଳରେ ଅଧିକାଂଶ ଡାକ୍ତରଖାନାରେ ଡାକ୍ତର ପଦ ଖାଲି ରହୁଛି। ଏଥିଯୋଗୁଁ ଲୋକମାନେ ଆବଶ୍ୟକ ସେବା ପାଇବାରୁ ବଞ୍ଚିତ ହେଉଛନ୍ତି।

ସୂଚନା ଅନୁସାରେ, ରାଜ୍ୟରେ ଥିବା ୪ଟି ହୋମିଓପ୍ୟାଥିକ କଲେଜରେ ୧୪୪ଟି ମଞ୍ଜୁରୀପ୍ରାପ୍ତ ଶିକ୍ଷକ ପଦ ରହିଥିବା ବେଳେ ଏଥିରୁ ୧୧୪ଟି ଖାଲି ପଡ଼ିଛି। ରାଉ‌ରକେଲାସ୍ଥିତ ଉତ୍କଳମଣି ହୋମିଓପ୍ୟାଥିକ କଲେଜ ଓ ହସ୍ପିଟାଲରେ ୨୯ଟି, ଭୁବନେଶ୍ବରସ୍ଥିତ ଡା. ଅଭିନ ଚନ୍ଦ୍ର ହୋମିଓପ୍ୟାଥିକ କଲେଜରେ ୨୮ଟି, ସମ୍ବଲପୁର ହେମିଓପ୍ୟାଥିକ କଲେଜରେ ୩୦ ଓ ବ୍ରହ୍ମପୁରସ୍ଥିତ ସରକାରୀ ହୋମିଓପ୍ୟାଥି କଲେଜରେ ୨୭ଟି ଡାକ୍ତରୀ ଶିକ୍ଷକ ପଦ ଖାଲି ରହିଛି। ଏହି ୪ କଲେଜରେ ୩୧ଟି ଅଣଶିକ୍ଷକ ପଦ ମଧ୍ୟ ଖାଲି ପଡ଼ିଛି। ବର୍ଷ ତଳେ ହୋମିଓପ୍ୟାଥିକ ‌ଡାକ୍ତରଙ୍କ କ୍ଷେତ୍ରରେ ବୟସସୀମା ୩୨ରୁ ୪୦ ବର୍ଷକୁ ବୃଦ୍ଧି କରାଯାଇଛି। ହୋମିଓପ୍ୟାଥିକ କଲେଜ ପାଇଁ ଖାଲି ପଡ଼ିଥିବା ୪୯ଶିକ୍ଷକ ପଦ ପୂରଣ ପାଇଁ ନିଷ୍ପତ୍ତି ହୋଇଥିଲେ ହେଁ ଏ ସଂକ୍ରାନ୍ତୀୟ ଚିଠି ଓପିଏସ୍‌ସିକୁ ଯାଇ ପାରିନାହିଁ। କିଛି ଉପରିସ୍ଥ ଅଧିକାରୀ ୪ହୋମିଓପ୍ୟାଥିକ କଲେଜରେ ଅସ୍ଥାୟୀ ଭାବେ ଅଧ୍ୟାପନା କରୁଥିବା ଶିକ୍ଷକମାନଙ୍କୁ ଥଇଥାନ କରିବା ପାଇଁ ଚକ୍ରାନ୍ତ ଚଳାଇଥିବା ଅଭିଯୋଗ ହୋଇଛି।