ବାରବାଟୀରେ ଭାରତର ଐତିହାସିକ ବିଜୟ

କଟକ: ଆଜି କଟକର ବାରବାଟୀରେ ହୋଇଥିବା ଭାରତ-ୱେଷ୍ଟଇଣ୍ଡିଜ୍ ମଧ୍ୟରେ ହୋଇଥିବା ନିର୍ଣ୍ଣାୟକ ମ୍ୟାଚ୍ ରେ ଭାରତର ଐତିହାସିକ ବିଜୟ ହୋଇଛି । ଭାରତ ୩୧୭ ରନ୍ କରି ୱେଷ୍ଟଇଣ୍ଡିଜ୍ କୁ ପରାସ୍ତ କରିଛି । ବାରବାଟୀ ଷ୍ଟାଡିୟମରେ ଆୟୋଜକ ଭାରତ ଓ ୱେଷ୍ଟଇଣ୍ଡିଜ୍‌‌ ମଧ୍ୟରେ ଅନୁଷ୍ଠିତ ଏକଦିବସୀୟ ଶୃଙ୍ଖଳାର ତୃତୀୟ ତଥା ଶେଷ ମ୍ୟାଚ୍‌‌ରେ ଭାରତ ୪ ୱିକେଟ୍‌‌ରେ ବିଜୟୀ ହୋଇଛି । ୩୧୬ ରନ୍‌‌ ବିଜୟ ଲକ୍ଷ୍ୟ ନେଇ ଭାରତ ବ୍ୟାଟିଂ ଆରମ୍ଭ କରି ୪୮.୪ ଓଭରରେ ୬ ୱିକେଟ ହରାଇ ବିଜୟ ହାସଲ କରିଛି । ଏହି ମ୍ୟାଚ୍‌‌ରେ ଟିମ୍‌‌ ଇଣ୍ଡିଆର ଅଲରାଉଣ୍ଡର ରବୀନ୍ଦ୍ର ଜାଦେଜା ଓ ଶାର୍ଦ୍ଦୁଳ ଠାକୁର ସଂକଟମୋଚକ ସାଜିଛନ୍ତି । ଜାଦେଜାଙ୍କ ଅପରାଜିତ ୩୯ ରନ୍‌‌ ଓ ଶାର୍ଦ୍ଦୁଲଙ୍କ ଅପରାଜିତ ୧୭ ରନ୍‌‌ ଭାରତକୁ ଏକ ସଂକଟରୁ ଉଦ୍ଧାର କରି ବିଜୟୀ କରିଛି । ରବୀନ୍ଦ୍ର ଜାଦେଜା ଓ ଶାର୍ଦ୍ଦୁଳ ଠାକୁର ଆଜି କ୍ରିକେଟ ପ୍ରଶଂସକ ଓ ଦର୍ଶକଙ୍କ ହୃଦୟ ଜିଣି ପାରିଛନ୍ତି । ଭାରତ ବାରବାଟୀ ଦିନିକିଆ ସମେତ ଶୃଙ୍ଖଳାକୁ ୨-୧ରେ ଜିତିଛି । ଟିମ୍‌‌ ଇଣ୍ଡିଆ ଦ୍ୱିତୀୟ ଦିନିକିଆରେ ବିଶାଖାପାଟଣାରେ ବିଜୟୀ ହୋଇଥିବା ବେଳେ ଚେନ୍ନାଇରେ ଅନୁଷ୍ଠିତ ପ୍ରଥମ ଦିନିକିଆକୁ ୱେଷ୍ଟଇଣ୍ଡିଜ୍‌‌ ଜିତିଥିଲା ।

ଆଜି କଟକ ବାରବାଟୀରେ ଖେଳାଯାଇଥିବା ରୋମାଞ୍ଚକର ମ୍ୟାଚରେ ଟସ୍ ଜିତି ପ୍ରଥମେ ବୋଲିଂ କରିବାର ନିଷ୍ପତ୍ତି ନେଇଥିଲା ଭାରତ । ବ୍ୟାଟିଂ ଆମନ୍ତ୍ରଣ ପାଇ ପଡିଆକୁ ଓହ୍ଲାଇଥିବା ୱେଷ୍ଟଇଣ୍ଡିଜ ପ୍ରଥମରୁ ଧିମା ବ୍ୟାଟିଂ ଆରମ୍ଭ କରିଥିଲା । କିନ୍ତୁ ପରେ ପରେ ବାରବାଟୀରେ ହୋଇଥିଲା ଛକା ଚୌକାର ବର୍ଷା । ନିକୋଲାସ ପୂରନ ଏବଂ ଅଧିନାୟକ କିରଣ ପୋଲାର୍ଡଙ୍କ ରୋମାଞ୍ଚକର ଅର୍ଦ୍ଧଶତକ ବଳରେ ନିର୍ଦ୍ଧାରିତ ୫୦ ଓଭରରେ ୫ଟି ୱିକେଟ ହରାଇ ୩୧୫ ରନ୍ କରିବାକୁ ସକ୍ଷମ ହୋଇଥିଲା ୱେଷ୍ଟଇଣ୍ଡିଜ