ଠିକ୍ ସମୟରେ ସରିବ ପରୀକ୍ଷା ଓ ବଢିବ ମୂଲ୍ୟାୟନକାରୀଙ୍କ ପାଉଣା : ଉଚ୍ଚଶିକ୍ଷା ମନ୍ତ୍ରୀ

ଭୁବନେଶ୍ବର : ଉଚ୍ଚଶିକ୍ଷା ବିଭାଗର ସମସ୍ତ ପରୀକ୍ଷା ଠିକ୍ ସମୟରେ ଶେଷ କରିବା ସହ ମୂଲ୍ୟାୟନକାରୀଙ୍କ ପାଉଣା ବଢାଯିବ। ଏନେଇ ବୁଧବାର ଅନୁଷ୍ଠିତ ଉଚ୍ଚଶିକ୍ଷା ସଂସ୍କାର ବୈଠକରେ ନିଷ୍ପତ୍ତି ନିଆଯାଇଛି। ବୈଠକ ପରେ ଉଚ୍ଚଶିକ୍ଷା ମନ୍ତ୍ରୀ ଅରୁଣ ସାହୁ ଗଣମାଧ୍ୟମକୁ ଏ ସମ୍ପର୍କରେ ସୂଚନା ଦେଇଛନ୍ତି।
ସେ କହିଛନ୍ତି, ଠିକ ସମୟରେ ପରୀକ୍ଷା ଆରମ୍ଭ ଓ ଶେଷ କରିବାକୁ ବୈଠକରେ ସମସ୍ତ ବିଶ୍ୱବିଦ୍ୟାଳୟ କୁଳ ସଚିବ ଓ ପରୀକ୍ଷା ନିୟନ୍ତ୍ରକଙ୍କ ସହ ଆଲୋଚନା କରାଯାଇଛି। ଏହା ସହିତ ଫଳାଫଳ ଶୀଘ୍ର ପ୍ରକାଶ କରିବା ଓ ପାଠ୍ୟକ୍ରମ ଆଗୁଆ ସାରିବା ଉପରେ ମଧ୍ୟ ଗୁରୁତ୍ୱାରୋପ କରାଯାଇଛି। ମୂଲ୍ୟାୟନ କେନ୍ଦ୍ର ଓ ପ୍ରଶ୍ନ ପତ୍ର ସେଟ୍ ମଧ୍ୟ ବଢିବ। ଏହା ସହ ମୂଲ୍ୟାୟନକାରୀଙ୍କ ପାଉଣା ମଧ୍ୟ ବୃଦ୍ଧି କରାଯିବ ବୋଲି ସେ କହିଛନ୍ତି।
ସୂଚନା ଅନୁସାରେ, ପୂର୍ବରୁ ଖାତା ଦେଖା ପାଇଁ ୧୫ରୁ ୨୦ ଟଙ୍କା ମିଳୁଥିବା ବେଳେ ଏବେ ୩୦ ଟଙ୍କା ମିଳିବ। ସେହିପରି ପ୍ରଶ୍ନ ପ୍ରସ୍ତୁତକାରୀଙ୍କୁ ପୂର୍ବରୁ ୫୦୦ ଟଙ୍କା ମିଳୁଥିଲା କିନ୍ତୁ ବର୍ତ୍ତମାନ ୧୦୦୦ ଟଙ୍କା ମିଳିବ। ଏହି ଉଚ୍ଚଶିକ୍ଷା ସଂସ୍କାର ବୈଠକରେ ଉଚ୍ଚଶିକ୍ଷା ମନ୍ତ୍ରୀ ଅରୁଣ ସାହୁ, ସଚିବ ଓ ଉଚ୍ଚଶିକ୍ଷା ପରିଷଦ ଉପାଧ୍ୟକ୍ଷ, ବିଶ୍ୱବିଦ୍ୟାଳୟ କୁଳସଚିବ ଓ ପରୀକ୍ଷା ନିୟନ୍ତ୍ରକ ପ୍ରମୁଖ ଉପସ୍ଥିତ ଥିଲେ।