ରାମ ମନ୍ଦିର ନିର୍ମାଣ ପାଇଁ ଜାନୁୟାରୀରେ ଟ୍ରଷ୍ଟ ଗଠନ

ନୂଆଦିଲ୍ଲୀ: ଅଯୋଧ୍ୟାରେ ରାମ ମନ୍ଦିର ନିର୍ମାଣ ପାଇଁ ଜାନୁୟାରୀରେ ଟ୍ରଷ୍ଟ ଗଠନ କରାଯିବ । ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ ଏଭଳି ନିଷ୍ପତି ନିଆଯାଇଥିବା ସୂଚନା ମିଳିଛି ।

ଟ୍ରଷ୍ଟ ଗଠନ ବାବଦରେ ଅଯୋଧ୍ୟାର କେତେ ଜଣ ପ୍ରମୁଖ ସାଧୁଙ୍କ ସହ ମଧ୍ୟ ଆଲୋଚନା ଚାଲିଛି। ସେମାନେ ମଧ୍ୟ ଟ୍ରଷ୍ଟ ପ୍ୟାନେଲ୍‌ରେ ସ୍ଥାନ ପାଇ ପାରନ୍ତି।

ବାବ୍ରି ମସ୍‌ଜିଦ୍‌ ପାଇଁ ଅନ୍ୟତ୍ର ୫ ଏକର ଜମି ଯୋଗାଇ ଦେବାକୁ କହି ନଭେମ୍ବର ୯ ତାରିଖ ରାୟରେ ସର୍ବୋଚ୍ଚ ଅଦାଲତ ରାମ ମନ୍ଦିର ନିର୍ମାଣ ନିମନ୍ତେ ବିବାଦୀୟ ସ୍ଥଳର ୨. ୭୭ ଏକର ଜମି ସରକାରଙ୍କୁ ହସ୍ତାନ୍ତର କରିଥିଲେ। ଏଥିସହ ମନ୍ଦିର ନିର୍ମାଣ ନିମେନ୍ତ ତିନି ମାସ ମଧ୍ୟରେ ଏକ ଟ୍ରଷ୍ଟ ଗଠନ କରିବାକୁ ମଧ୍ୟ ଅଦାଲତ ସରକାରଙ୍କୁ ନିର୍ଦେଶ ଦେଇଥିଲେ।

ଚାରି ମାସ ମଧ୍ୟରେ ବିଶାଳ ନଭଶ୍ଚୁମ୍ବୀ ରାମ ମନ୍ଦିର ନିର୍ମାଣ ନିମନ୍ତେ କାର୍ଯ୍ୟ ଆରମ୍ଭ ହେବ ବୋଲି କିଛି ଦିନ ତଳେ ଗୃହମନ୍ତ୍ରୀ ଅମିତ ଶାହା ଘୋଷଣା କରିଥିଲେ।