ନୂଆଦିଲ୍ଲୀ: ପୁନେର ବୈଜ୍ଞାନିକମାନେ କୋରୋନା ଭାଇରସର ଫଟୋ ଲୋକଲୋଚନା କରାଇଛନ୍ତି । ଭାରତରେ ପ୍ରଥମେ ୨୦୨୦ ଜାନୁଆରି ୩୦ ତାରିଖ ଦିନ ଲାବ୍ରୋଟରି ଦ୍ୱାରା ନିଶ୍ଚିତ କରାଯାଇଥିବା ଅଭିନବ କରୋନାଭାଇରସ୍ ଆକ୍ରାନ୍ତ ମହିଳାଙ୍କ ଗଳାରୁ ନିଆଯାଇଥିବା ସ୍ୱାବ୍ ନମୁନାରୁ ଚିତ୍ର ଉତୋଳନ କରାଯାଇଛି । “ଇଣ୍ଡିଆନ୍ ଜର୍ଣ୍ଣାଲ୍ ଅଫ୍ ମେଡିକାଲ୍ ରିସର୍ଚ’ରେ ଏହି ଚିତ୍ର ପ୍ରକାଶ ପାଇଛି ।
ସମ୍ପୃକ୍ତ ମହିଳା ହେଉଛନ୍ତି ଊହାନରେ ଡାକ୍ତରୀ ପଢୁଥିବା ତିନିଜଣ ବିଦ୍ୟାର୍ଥୀଙ୍କ ମଧ୍ୟରୁ ଅନ୍ୟତମା । ଘରକୁ ଫେରିବା ପରେ ସେ କୋଭିଡ୍-୧୯ରେ ଆକ୍ରାନ୍ତ ହୋଇଥିବା କଥା ସ୍ୱାବ୍ ପରୀକ୍ଷାରୁ ଜଣାପଡ଼ିଥିଲା ।
ଇଣ୍ଡିଆନ୍ କାଉନସିଲ୍ ଅଫ୍ ମେଡିକାଲ୍ ରିସର୍ଚର ପୂର୍ବତନ ମହାନିର୍ଦେଶକ ଡକ୍ଟର୍ ନିର୍ମଳ କୁମାର ଗାଙ୍ଗୁଲୀ କହିଛନ୍ତି ଯେ କୋରୋନାଭାଇରସର ଚେହେରା ଗୋଟାଏ “ମୁକୁଟ’ ବା “କ୍ରାଉନ୍’ ସଦୃଶ । ତା’ ଦେହରେ ଉଠିଥିବା ପ୍ରୋଟିନ୍ କଂଟକଗୁଡ଼ିକ ଯୋଗୁଁ ସେ ମୁକୁଟ ପରି ଦିଶୁଥିବାରୁ ତା’ର ନାଁ “କରୋନା’ ରଖାଯାଇଛି । ଲାଟିନ୍ ଭାଷାରେ “କ୍ରାଉନ୍’ ବା “ମୁକଟ’କୁ “କରୋନା’ କୁହାଯାଏ । ଏହି ଭାଇରସ୍ ଶରୀର ମଧ୍ୟରେ ଥିବା “ପ୍ରୋଟିନ୍’ ଏବଂ “ସୁଗର’ ଆଦି ଗୁଡ଼ାଏ “ରିସେପ୍ଟର୍'(ସମ୍ବେଦନଶୀଳ ଜୀବକୋଷ)ଙ୍କୁ ବାରି ପାରେ । ପ୍ରଥମେ ଏହି “ରିସେପଟର୍’ଙ୍କ ଠାରେ ଲାଖି ରହିବା ପରେ କରୋନାଭାଇରସ୍ ଜୀବକୋଷ ମଧ୍ୟକୁ ପ୍ରବେଶ କରିଥାଏ ।
ସଂଗୃହୀତ ନମୁନାର ଅନୁଶୀଳନାତ୍ମକ ଅଧ୍ୟୟନ କରି ବୈଜ୍ଞାନିକମାନେ କରୋନାଭାଇରସର ଆନୁବଂଶିକ ସୃଷ୍ଟି ଏବଂ ବିବର୍ତ୍ତନକୁ ଚିହ୍ନଟ କରିଥିଲେ । ପୁନେସ୍ଥିତ “ଏନଆଇଭି’ରେ ସଜ୍ଜିକରଣ ହୋଇଥିବା ଉକ୍ତ ଭୂତାଣୁର ଗୁଣସୂତ୍ର ଊହାନର କରୋନାଭାଇରସ୍ ଗୁଣସୂତ୍ର ସହ ୯୯. ୯୮% ମେଳ ଖାଉଛି । ଏହି ଭୂତାଣୁ କିଭଳି ମଣିଷକୁ ସଂକ୍ରମିତ କରୁଛି ତାହା ଜାଣିବାରେ ଏହି ଅଧ୍ୟୟନ ସହାୟତା କରିବ ବୋଲି ବିଶ୍ୱାସ କରାଯାଉଛି ।