ଫିଲ୍ମ ନିର୍ମାତା ତଥା ନିର୍ଦ୍ଦେଶକ ମନମୋହନ ମହାପାତ୍ରଙ୍କ ପରଲୋକ

ଭୁବନେଶ୍ୱର: ଓଡ଼ିଶାର ବିଶିଷ୍ଟ ଫିଲ୍ମ ନିର୍ମାତା, ଲେଖକ ତଥା ନିର୍ଦ୍ଦେଶକ ମନମୋହନ ମହାପାତ୍ରଙ୍କର ପରଲୋକ ଘଟିଛି । ଆଜି ଭୁବନେଶ୍ୱରରର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ଦେହାନ୍ତ ହୋଇଥିବା ଜଣାପଡିଛି । ମୃତ୍ୟୁବେଳକୁ ତାଙ୍କର ବୟସ ୬୯ ବର୍ଷ ହୋଇଥିଲା । ତାଙ୍କ ବିୟୋଗର ଖବର ଶୁଣି ଓଲିଉଡରେ ଶୋକର ଛାୟା ଖେଳିଯାଇଛି ।

୧୯୫୧ ମସିହାରେ ମନମୋହନ ମହାପାତ୍ରଙ୍କ ଜନ୍ମ ହୋଇଥିଲା। ସେ ପୁନେ ଏଫ୍‌ଟିଆଇଆଇରୁ ପାସ୍‌ କରିବା ପରେ ୧୯୭୬ ମସିହାରେ ଓଡ଼ିଆ ଫିଲ୍ମ ‘ଶୀତରାତି’ ନିର୍ଦ୍ଦେଶନା ଦେଇଥିଲେ। ଏହି ଫିଲ୍ମ ଜାତୀୟ ପୁରସ୍କାର ପାଇଥିଲା। ଏହି ଫିଲ୍ମ ୧୯୮୨ ମସିହାରେ ଆନ୍ତର୍ଜାତୀୟ ଫିଲ୍ମ ଫେଷ୍ଟିଭାଲ୍‌ରେ ପ୍ରଦର୍ଶିତ ହୋଇଥିଲା। ‘ନିଶିତ ସ୍ୱପ୍ନ‘, ‘ମଝି ପାହାଚ’, ‘ଟାୟାର୍ଡ ଆପ୍‌ଟରନୋନ୍‌’, ‘ନିରବଝଡ଼’, ‘ଶୀତରାତି’, ‘ଭିନ୍ନ ସମୟ’ ପରି ଫିଲ୍ମ ପାଇଁ ସେ ୮ ଥର ଜାତୀୟ ପୁରସ୍କାର ପାଇଛନ୍ତି। ଏହାଛଡ଼ା ‘କ୍ଲାନ୍ତ ଅପରାହ୍ନ’, ‘ଅନ୍ଧ ଦିଗନ୍ତ’, ‘ଅଗ୍ନିବୀଣା’ ଆଦି ଫିଲ୍ମ ମନମୋହନଙ୍କ ଅନ୍ୟତମ ସୃଷ୍ଟି।