ଖୋର୍ଦ୍ଧା: ଖୋର୍ଦ୍ଧା ଜିଲ୍ଲା ରାମେଶ୍ୱର ନିକଟରେ ଗତକାଲି ବିଳମ୍ବିତ ରାତିରେ ହୋଇଥିବା ଏନ୍କାଉଣ୍ଟର୍ରେ ଦୁର୍ଦ୍ଦାନ୍ତ ଅପରାଧୀ ଜାମସେଦ ଖାଁ ଆହତ ହୋଇଛି। ତା ବାମ ଗୋଡ଼ରେ ଗୁଳି ବାଜିଛି। ପ୍ରଥମେ ତାକୁ ଖୋର୍ଦ୍ଧା ଡାକ୍ତରଖାନାରେ ଭର୍ତ୍ତି କରାଯାଇଥିଲା। ପରେ ଭୁବନେଶ୍ୱରସ୍ଥିତ ଏମସ୍ରେ ଭର୍ତ୍ତି କରାଯାଇଛି।
ଜାମସେଦ ରାମେଶ୍ୱର ନିକଟସ୍ଥ ଜଙ୍ଗଲ ଭିତରେ ଥିବା ନେଇ ପୁଲିସ୍ କୌଣସି ସୂତ୍ରରୁ ଖବର ପାଇଥିଲା। ଏହାପରେ ନିରାକାରପୁର ଥାନା ଆଇଆଇସି ଓ ଟାଙ୍ଗୀ ଥାନା ଆଇଆଇସିଙ୍କ ନେତୃତ୍ୱରେ ଏକ ଟିମ୍ ଗଠିତ ହୋଇଥିଲା। ଏହି ଟିମ୍ ଗତ କାଲି ରାତି ପ୍ରାୟ ଗୋଟାଏ ବେଳେ ପୂର୍ବ ଯୋଜନା ଅନୁଯାୟୀ ଉକ୍ତ ଜଙ୍ଗଲରେ ଚଢ଼ଉ କରିଥିଲା। ଚଢ଼ଉ ବେଳେ ଜାମସେଦ ପୁଲିସ୍ ଉପରକୁ ବୋମାମାଡ଼ କରିଥିଲା। ଏଥିରେ ନିରାକାରପୁର ଥାନା ଆଇଆଇସି ଓ ଟାଙ୍ଗୀ ଆଇଆଇସି ଆହତ ହୋଇଥିଲେ। ଏହା ପରେ ପୁଲିସ୍ ପାଲଟା ଜବାବ ଦେଇ ଜାମସେଦ ଉପରକୁ ଗୁଳି ଚଳାଇଥିଲା। ଗୁଳି ତା ବାମ ଗୋଡ଼ରେ ବାଜିଥିଲା। ଜାମସେଦ ନାଁରେ ବିଭିନ୍ନ ଥାନାରେ ଏକାଧିକ ମାମଲା ଥିବା ଜଣାପଡ଼ିଛି।