ନୂଆଦିଲ୍ଲୀ: ଆଗାମୀ ଦିଲ୍ଲୀ ବିଧାନସଭା ନିର୍ବାଚନ ପାଇଁ ଭାରତୀୟ ଜନତା ପାର୍ଟି ନିଜର ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଜାରି କରିଛି । ୫୭ ଜଣ ପ୍ରାର୍ଥୀଙ୍କ ନାଁ ଘୋଷଣା ହୋଇଛି । ବିଜେପି ପକ୍ଷରୁ ଜାରି ପ୍ରାର୍ଥୀ ତାଲିକାରେ ୪ ଜଣ ମହିଳାଙ୍କ ସମେତ ୧୧ ଜଣ ଅନୁସୂଚିତି ଜାତିରୁ ସାମିଲ ଅଛନ୍ତି ।
ଦିଲ୍ଲୀ ବିଧାନସଭା ନିର୍ବାଚନ ପାଇଁ ୫୭ ଜଣ ପ୍ରାର୍ଥୀଙ୍କ ପ୍ରଥମ ଲିଷ୍ଟ ଘୋଷଣା କରିଛନ୍ତି ଦିଲ୍ଲୀ ବିଜେପି ଅଧ୍ୟକ୍ଷ ମନୋଜ ତିୱାରୀ । ବାକି ୧୩ଟି ଆସନ ଉପରେ ଶୀଘ୍ର ପ୍ରାର୍ଥୀ ଘୋଷଣା ହେବା ନେଇ ସୂଚନା ଦେଇଛନ୍ତି ମନୋଜ ।
ବିଜେପିର ପକ୍ଷରୁ ଜାରି ପ୍ରାର୍ଥୀ ତାଲିକା ଅନୁସାରେ ଆମ ଆଦମୀ ପାର୍ଟିରୁ ବହୁ ପୂର୍ବରୁ ଇସ୍ତଫା ଦେଇସାରିଥିବା କପିଲ ମିଶ୍ର ମଡେଲ ଟାଉନରୁ ନିର୍ବାଚନ ଲଢିବେ । ମଡେଲ ଟାଉନ ଆସନରେ କପିଲଙ୍କ ବିପକ୍ଷରେ ଅଛନ୍ତି ଆପ ପ୍ରାର୍ଥୀ ଅଖିଳେଶ ପତି ତ୍ରିପାଠୀ । ଅଖିଳେଶ ଏହି ଆସନରୁ ୨ ଥର ନିର୍ବାଚନ ଜିତି ସାରିଛନ୍ତି । ସେହିପରି ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ବିରୁଦ୍ଧରେ ବିଜେପି ରବି ନେଗୀଙ୍କୁ ନିର୍ବାଚନ ମୈଦାନରେ ଛିଡା କରିଛି । କେଜ୍ରିଓ୍ବାଲ ସରକାରରେ କ୍ୟାବିନେଟ ମନ୍ତ୍ରୀ ସତେନ୍ଦ୍ର ଜୈନଙ୍କ ବିରୋଧରେ ଶକୁର ବସ୍ତିରୁ ଡାକ୍ତର ଏସସି ବସ୍ତଙ୍କୁ ଟିକେଟ ଦେଇଛି ବିଜେପି । ଏହାସହ ରିଠିଲାରୁ ବିଜୟ ଚୌଧୁରୀ, ବବାନାରୁ ରବୀନ୍ଦ୍ର କୁମାର, ରୋହିଣୀରୁ ବିଜେନ୍ଦ୍ର ଗୁପ୍ତା ପ୍ରାର୍ଥୀ ରହିଛନ୍ତି ।
ଅନ୍ୟପକ୍ଷେ ବିଜେପିର ପ୍ରାର୍ଥୀ ତାଲିକାରେ ୪ ମହିଳାଙ୍କ ନାଁ ରହିଛି । ଦଳ ସାଲିମାରବାଗରୁ ଶ୍ରୀମତି ରେଖାଗୁପ୍ତା, ବଲ୍ଲିମାରାନରୁ ଲତା ସୋଢୀ, ଗ୍ରେଟର କୈଳାଶରୁ ରେଖା ରାୟଙ୍କୁ ଟିକେଟ ଦେଇଛି ।