ଗାନ୍ଧୀ ଜୟନ୍ତୀ ଅବସରରେ ନୂତନ ପରିବା ବଜାର ଉଦଘାଟିତ

ଦେବଗଡ: ପବିତ୍ର ଗାନ୍ଧୀ ଜୟନ୍ତୀ ଅବସରରେ ଆଜି ଦେବଗଡ ପୌରପରିଷଦ ପକ୍ଷରୁ ୫୭ ଲକ୍ଷରୁ ଉର୍ଦ୍ଧ୍ୱ ଟଙ୍କା ବ୍ୟୟରେ ନିର୍ମୀତ ନୂତନ ପରିବା ବଜାର ଉଦଘାଟିତ ହୋଇଯାଇଛି । ଏହାକୁ ଦେବଗଡ ଜିଲାପାଳ ସୁଧାଂଶୁ ମୋହନ ସାମଲ ଓ ଅନ୍ୟଣ୍ୟ ଅଧିକାରୀଙ୍କ ଉପସ୍ଥିତିରେ ମୁଗଫଳି ନାମ୍ନି ଜଣେ ମହିଳା ପରିବା ବ୍ୟବସାୟୀ ଫିତାକାଟି ଉଦଘାଟନ କରିଥିଲେ ।

debgarh news

ଏହି ଅବସରରେ ସ୍ୱଚ୍ଛ ଭାରତ ମିଶନ ପକ୍ଷରୁ ଦେବଗଡ ପୌରାଂଚଳର ବେଞ୍ଜାତିନାଳିରେ ପ୍ରାୟ ୭୮ ଲକ୍ଷ ଟଙ୍କା ବ୍ୟୟରେ ନୂତନ ଭାବେ ନିର୍ମୀତ ମାଇକ୍ରୋ କମ୍ପୋଷ୍ଟିଂ ସେଂଟର(ଏମ୍‌.ସି.ସି.)ରୁ ପ୍ରସ୍ତୁତ ‘ମୋ ଖତ’କୁ କିଲାପାଳ ଶ୍ରୀ ସାମଲ ଆନୁଷ୍ଠାନିକ ଭାବେ ଶୁଭାରମ୍ଭ କରିଥିଲେ । ଏହି କାର୍ଯ୍ୟକ୍ରମରେ ଦେବଗଡ ପୌରପରିଷଦର ନିର୍ବାହୀ ଅଧିକାରୀ ବିକ୍ରାନୀ କିସପଟା, ମୂନିସିପାଲିଟୀ ଇଞ୍ଜିନିୟର ସରସ୍ୱତୀ ମହାନନ୍ଦ,ଡେପୁଟୀ କଲେକ୍ଟର କୈବଲ୍ୟ କର,ଯଶୋବନ୍ତ ଦେହୁରୀ, ପୌର ପରିଷଦର କମ୍ୟୁନିଟୀ ଅର୍ଗାନାଇଜର ମୋନାଲିଶା ପଣ୍ଡା,କନିଷ୍ଠ ଯନ୍ତ୍ରୀ ବିଜୟାନନ୍ଦ ସାହୁ,ଘନଶ୍ୟାମ ସାହୁ ଓ ପ୍ରିୟଂକା ଦେଓ,ପୌର ପରିଷଦ କର୍ମଚାରୀ ଅଶ୍ୱିନୀ ବେହେରା,ବିନୋଦ କୁମାର ନାଗ, ସି.ଏଲ.ଟି.ସି.ପରେଶ କୁମାର ପ୍ରଧାନ ଓ ପ୍ରଦୀପ କୁମାର ସ୍ୱାଇଁଙ୍କ ସମେତ ଦେବଗଡ ଫୌର ପରିଷଦର ବହୁ କର୍ମଚାରୀ ଓ ୧୧ ଟି ଯାକ ୱାର୍ଡର ସ୍ୱଚ୍ଛସାଥୀ ମାନେ ଉପସ୍ଥିତ ଥିଲେ । ଏଠାରେ ସୂଚନା ଯୋଗ୍ୟ ଯେ, ଦେବଗଡ ସହରରୁ ବାହାରୁଥିବା ବିଭିନ୍ନ ପ୍ରକାରର ଅଳିଆ ଆବର୍ଜନାକୁ (ଏମ୍‌.ସି.ସି.)ରେ ପ୍ରକ୍ରିୟା କରଣ କରାଯାଇ ସେଥିରୁ ଖତ(ଗୋବର)ପ୍ରସ୍ତୁତ କରାଯାଉଛି । ଦେବଗଡ ପୌର ପରିଷଦ ପକ୍ଷରୁ ଏହି ଖତକୁ ଆଜିଠାରୁ ସର୍ବ ସାଧାରଣଙ୍କ କ୍ରୟ ନିମନ୍ତେ ସାର୍ବଜନୀନ କରାଯାଇଛି । ଅନ୍ୟପକ୍ଷରେ ପୂର୍ବରୁ ଖୋଲାଆକାଶ ତଳେ ପରିବା ବ୍ୟବସାୟୀ ମାନେ ବସି ବ୍ୟବସାୟ କରୁଥିବାରୁ ଗ୍ରୀଷ୍ମ,ବର୍ଷା ଓ ଶୀତ ଦିନରେ ଉଭୟ ବ୍ୟବସାୟୀ ଓ ଗ୍ରାହକ ମାନେ ଅକଥନୀୟ ଦୁର୍ଦ୍ଦଶାର ସମ୍ମୁଖିନ ହେଉଥିଲେ । ଏହି ସମସ୍ୟାର ସମାଧାନ ନିମନ୍ତେ ପରିବା ବ୍ୟବସାୟୀଙ୍କ ଠାରୁ ଆରମ୍ଭ କରି ଦେବଗଡ ଜନ ସାଧାରଣ ଓ ବିଭିନ୍ନ ଅନୁଷ୍ଠାନ ପକ୍ଷରୁ ଦାବୀ ହେବା ପରେ ପୌରପରିଷଦ ପକ୍ଷରୁ ଉପରୋକ୍ତ ପିଣ୍ଡି ଓ ଛାଉଣୀ ବିଶିଷ୍ଟ ନୂତନ ବଜାର ପ୍ରାଙ୍ଗଣ ନିର୍ମୀତ ହୋଇଛି ।