କ୍ରାନ୍ତି ଦିବସ ରୁ ସ୍ୱାଧୀନତା ଦିବସ ପର୍ଯ୍ୟନ୍ତ ସପ୍ତାହବ୍ୟାପୀ ରକ୍ତଦାନ କାର୍ଯ୍ୟକ୍ରମ

୧୦ ହଜାର ୟୁନିଟ୍ ରକ୍ତ ସଂଗ୍ରହ ପାଇଁ ଲକ୍ଷ ଧାର୍ଯ୍ୟ

ଭୁବନେଶ୍ୱର: “ଓଡିଶା ମୋ ପରିବାର-ଜୀବନ ବିନ୍ଦୁ”ର ଏକ ସ୍ୱତନ୍ତ୍ର ଅଭିଯାନ ଆଗାମୀ ଅଗଷ୍ଟ  ୯ ତାରିଖ (କ୍ରାନ୍ତି ଦିବସ)ରୁ ଅଗଷ୍ଠ ୧୫ ତାରିଖ (ସ୍ବାଧୀନତା ଦିବସ) ପର୍ଯ୍ୟନ୍ତ କରାଯିବ | ବର୍ତ୍ତମାନ କରୋନା ମହାମାରୀର ଜଟିଳମୟ ସ୍ଥିତିରେ ରାଜ୍ୟରେ ସ୍ବେଚ୍ଛାକୃତ ରକ୍ତଦାନ ସଂଗ୍ରହ ହାର କମିଯାଇ ଥିବା ଉଦବେଗର କାରଣ ପାଲଟିଛି | ଏହି ପରିପ୍ରେକ୍ଷୀରେ ରକ୍ତ ଆବଶ୍ୟକ କରୁଥିବା ବିଭିନ୍ନ ରୋଗୀ ଏବଂ ବିଶେଷ କରି ଥାଲାସେମିଆ, ସିକିଲସେଲ୍, ହେମୋଫିଲିଆ ରୋଗୀମାନେ ବିକଳ୍ପ ନପାଇ ଅସୁବିଧାର ସମ୍ମୁଖୀନ ହେଉଛନ୍ତି | ତେଣୁ ଏହି ପରିପ୍ରେକ୍ଷୀରେ ଓଡିଶାର ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକଙ୍କ ଆହ୍ବାନରେ “ଓଡିଶା ମୋ ପରିବାର-ଜୀବନ ବିନ୍ଦୁ” ତରଫରୁ ଓଡିଶା-ମୋ ପରିବାର ଆବାହକ ଶ୍ରୀ ଅରୁପ ପଟ୍ଟନାୟକ, ମୁଖ୍ୟ ସଂଯୋଜକ ଶ୍ରୀ ଦେବୀ ପ୍ରସାଦ ମିଶ୍ର, ସହ ମୁଖ୍ୟ ସଂଯୋଜକ ଶ୍ରୀ ଅତନୁ ସବ୍ୟସାଚୀ ନାୟକ ପ୍ରକାଶ କରିଛନ୍ତି |

ରାଜ୍ୟରେ ପାଖାପାଖି ୨ ଲକ୍ଷ ୟୁନିଟ୍ ରକ୍ତ ସ୍ବେଚ୍ଛାକୃତ ରକ୍ତଦାନ ମାଧ୍ୟମରେ ବିଭିନ୍ନ ସଂଗଠନ ମାନଙ୍କରୁ ସଂଗୃହୀତ ହୋଇଥାଏ |ଏଥିରେ “ଜୀବନ ବିନ୍ଦୁ”ର ଉଲ୍ଲେଖନୀୟ ଯୋଗଦାନ ରହିଛି | କରୋନା ମହାମାରୀର ଜଟିଳମୟ ପରିସ୍ଥିତିରେ ଏପ୍ରିଲ୍ ଏବଂ ତା’ ପରଠାରୁ ସ୍ବେଚ୍ଛାକୃତ ରକ୍ତଦାନ ସଂଗ୍ରହ ହାର କମି କମି ଆସିବା ପରିଲକ୍ଷିତ ହେଉଛି ଓ ଜୁନ୍, ଜୁଲାଇରେ ଏହା ଉତ୍କଟ ପରିସ୍ଥିତିରେ ପହଞ୍ଚିଛି ବୋଲି ରାଜ୍ୟର ୫୬ ଟି ସରକାରୀ ଓ ରେଡକ୍ରସ୍ ରକ୍ତଭଣ୍ଡାର ତଥା ୭ ଟି ବେସରକାରୀ ରକ୍ତଭଣ୍ଡାର ସୂତ୍ରରୁ ଜଣାଯାଏ |

ତେଣୁ ବର୍ତ୍ତମାନର ପରିସ୍ଥିତିରେ ଏହି ଅଭାବ ବୋଧକୁ ଅନେକାଶଂରେ ପୂରଣ କରିବା ପାଇଁ ମାନ୍ୟବର ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ “ଓଡିଶା ମୋ ପରିବାର-ଜୀବନ ବିନ୍ଦୁ” ତରଫରୁ ନିଷ୍ପତ୍ତି ନିଆଯାଇଛି | ଏହି ମର୍ମରେ ସପ୍ତାହବ୍ୟାପୀ ରକ୍ତଦାନ କାର୍ଯ୍ୟକ୍ରମକୁ ରାଜ୍ୟର ୩୦ ଟି ଜିଲ୍ଲାରେ ସଫଳ କରିବା ପାଇଁ ସ୍ଥାନୀୟ ବିଧାୟକ, ସାଂସଦ, ଜନ ପ୍ରତିନିଧି ତଥା ସ୍ବେଚ୍ଛାସେବୀ ଅନୁଷ୍ଠାନ ଓ ମହିଳା ସଂଗଠନମାନଙ୍କୁ ସାମିଲ ହେବା ପାଇଁ “ଓଡିଶା-ମୋ ପରିବାର” ତରଫରୁ ଅନୁରୋଧ କରାଯାଉଛି | ସ୍ଥାନୀୟ ଜିଲ୍ଲା ଓ ସ୍ବାସ୍ଥ୍ୟ ପ୍ରଶାସନର ଅନୁମତି କ୍ରମେ କୋଭିଡ୍ ସ୍ଥିତିରେ ଥିବା ନିୟମାବଳୀର ଅନୁପାଳନ କରି ସ୍ବେଚ୍ଛାକୃତ ରକ୍ତଦାନ ଶିବିର ଆୟୋଜନ କରିବା ପାଇଁ ” ଓଡିଶା-ମୋ ପରିବାର” ତରଫରୁ ପରାମର୍ଶ ଦିଆଯାଇଛି |

ଏଠାରେ ସୂଚନାଯୋଗ୍ୟ ଯେ, ଏହି ସପ୍ତାହବ୍ୟାପୀ ରକ୍ତଦାନ କାର୍ଯ୍ୟକ୍ରମରେ ପ୍ରାୟ ୧୦ ହଜାର ୟୁନିଟ୍ ରକ୍ତ ସଂଗ୍ରହ ପାଇଁ ଲକ୍ଷ ରଖାଯାଇଛି | ଗଞ୍ଜାମ ଭଳି ଜିଲ୍ଲାରେ ପ୍ରତିକୂଳ ପରିସ୍ଥିତିରେ ରକ୍ତର ଅଭାବ ଦୂର କରିବା ପାଇଁ ‘ ଓଡିଶା-ମୋ ପରିବାର’ ତରଫରୁ ପ୍ରତିଦିନ ରକ୍ତ ସଂଗ୍ରହ କାର୍ଯ୍ୟକ୍ରମ ଆରମ୍ଭ ହୋଇଛି | ଯାଜପୁର ଟାଉନରେ ପ୍ରତି ସପ୍ତାହରେ ଗୋଟିଏ ଲେଖାଏଁ ରକ୍ତଦାନ ଶିବିର ଅନୁଷ୍ଠିତ ହେଉଛି | ଇତି ମଧ୍ୟରେ ୬୦ ଟି ରକ୍ତଦାନ ଶିବିର ଅନୁଷ୍ଠିତ ହୋଇ ସାରିଲାଣି | କଟକ ସହରରେ ରକ୍ତର ଅଭାବ ଦୂର ପାଇଁ ଛାତ୍ର ସଂଗଠନ ତରଫରୁ ଏକ ସପ୍ତାହବ୍ୟାପୀ ରକ୍ତ ସଂଗ୍ରହ ଅଭିଯାନ ଅନୁଷ୍ଠିତ ହୋଇ ୫୮୭ ୟୁନିଟ୍ ରକ୍ତ ସଂଗୃହୀତ ହୋଇଛି | କୋଭିଡ୍ ପରିପ୍ରେକ୍ଷୀରେ ରକ୍ତଭଣ୍ଡାରର ଉତ୍କଟ ଅବାବକୁ ଲକ୍ଷ କରି ଓଡିଶାର ନୂଆପଡା, ଦେବଗଡ, ମୟୂରଭଞ୍ଜ, ସମ୍ବଲପୁର, ବରଗଡ ଇତ୍ୟାଦି ବିଭିନ୍ନ ପ୍ରାନ୍ତରେ ସ୍ବେଚ୍ଛାକୃତ ରକ୍ତଦାନ ଶିବିର ଅନୁଷ୍ଠିତ ହୋଇଛି |

“ରକ୍ତଦାନ, ମହତ୍ ଦାନ”, ତେଣୁ ସାମ୍ପ୍ରତିକ ସ୍ବେଚ୍ଛାକୃତ ରକ୍ତଦାନ ସ୍ଥିତିରେ ସଂପୃକ୍ତ ରକ୍ତଦାତାମାନଙ୍କୁ ଆଗେଇ ଆସିବା ପାଇଁ ଅନୁରୋଧ କରାଯାଉଛି |