ଗୁଣିଆଙ୍କ କାମୁଡା ଚିକିତ୍ସା : ରୋଗ ଭଲ ଲାଗି ମହିଳାଙ୍କ ଶରୀର ସାରା କାମୁଡ଼ିଲେ ଚିକିତ୍ସକ

ମାଲକାନଗିରି : ଗୁଣିଆଙ୍କ କାମୁଡା ଚିକିତ୍ସା । ଏମିତି ଏକ ବିଚିତ୍ର ଚିକିତ୍ସା ଦେଖିବାକୁ ମିଳିଛି ମାଲକାନଗିରିରେ । କାଲିମେଳା ତେଲରାଇ ପଂଚାୟତର ଉର୍ମାଗୁଡ଼ା ଗାଁରେ ଜଣେ ଗୁଣିଆ ଏମିତି ଅଜବ ପ୍ରଣାଳୀରେ ଚିକିତ୍ସା କରୁଥିବା ଦେଖିବାକୁ ମିଳିଛି । ଏହି ଗୁଣିଆ ଜଣଙ୍କ ଜଣେ ମହିଳା ରୋଗୀଙ୍କୁ ସୁସ୍ଥ କରିବାକୁ ଝଡ଼ାଫୁଙ୍କା କରିଥିଲେ । ହାତରେ ଏକ ମୟୂରପୁଛ ଧରି ରୋଗୀକୁ ଝାଡ଼ିବା ପରେ ଗୁଣିଆ ଜଣଙ୍କ ମହିଳା ରୋଗୀଙ୍କ ଶରୀର ସାରା କାମୁଡ଼ି ଚାଲିଥିଲା। ରୋଗୀର ପିଠି, ବେକ, ଛାତି ଓ ପେଟକୁ କାମୁଡ଼ି ଗୁଣିଆ ଜଣଙ୍କ ସଂପୂର୍ଣ୍ଣ ଭଲ ହୋଇଯିବ ବୋଲି ବିଶ୍ବାସ ଜନ୍ମାଇ ଚାଲିଥିଲା। ଅନ୍ୟପଟେ ରୋଗୀ ଯନ୍ତ୍ରଣାରେ ଛଟପଟ ହେଉଥିଲେ । ମାଲକାନଗିରି ଜିଲ୍ଲାରେ ଲୋକେ ଏବେ ବି ଅନ୍ଧବିଶ୍ବାସରେ ଘୋରି ହୋଇ ରହିଛନ୍ତି ।

ଛୋଟମୋଟ ସମସ୍ୟା ହେଲେ ଗୁଣିଆ ତଥା ଦିଶାରୀ ନିକଟକୁ ଚାଲିଯାଉଛନ୍ତି । ରୋଗ ହେଲେ ଡାକ୍ତରଖାନା ଅପେକ୍ଷା ଝଡ଼ାଫୁଙ୍କା ଉପରେ ଅତୁଟ ବିଶ୍ବାସ ରହିଛି । ଏହି ଦୃଶ୍ୟ ଦେଖିବାକୁ ଯେତିକି ଆଶ୍ଚର୍ଯ୍ୟ ଜନକ ସେତିକି ହୃଦୟ ବିଦାରକ । ଉର୍ମାଗୁଡ଼ା ଗାଁର ଦେବା ବେଟୀଙ୍କ ପତ୍ନୀ ଦୁଲେ ବେଟୀ ଜ୍ୱରରେ ଆକ୍ରାନ୍ତ ହୋଇ ରହିଥିଲେ । ଭୀଷଣ ଜ୍ୱର ସାଙ୍ଗକୁ ହାତଗୋଡ଼ରେ ବ୍ୟଥା ହେଉଥିଲା । ଏମିତି ସ୍ଥିତିରେ ଦୁଲେ ମେଡିକାଲ ଯିବା ପରିବର୍ତେ ଗୁଣିଆଙ୍କ ନିକଟକୁ ଗଲେ ସଂପୂର୍ଣ୍ଣ ସୁସ୍ଥ ହୋଇଯିବାର ବିଶ୍ବାସ ନେଇ ଆସିଥିଲେ । ଗୁଣିଆ କାମୁଡ଼ାରୁ ଯନ୍ତ୍ରଣା ହେଉଥିଲେ ବି ସେ ଏହାକୁ ସହ୍ୟ କରି ନେଇଥିଲେ । କେବଳ ଏହା ଗୋଟିଏ ଘଟଣା ନୁହେଁ, ଏହିପରି ଅନେକ ରୋଗୀ ମେଡିକାଲ ନ ଯାଇ ଗୁଣି ଗାରେଡ଼ି ଉପରେ ନିର୍ଭର କରି ମୃତ୍ୟୁମୁଖରେ ପଡୁଛନ୍ତି । ଏଭଳି କ୍ଷେତ୍ରରେ ଲୋକଙ୍କୁ ସଚେତନ କରିବା ପ୍ରଶାସନର ବଡ ଦାୟିତ୍ବ ।