ଶ୍ରୀମନ୍ଦିର ସଂସ୍କାର ନେଇ ୨ରେ ରିପୋର୍ଟ ଦାଖଲ; ୭ହେବ ଶୁଣାଣି

ଶ୍ରୀମନ୍ଦିର ପରିଚାଳନା କମିଟି ବୈଠକ

ପୁରୀ: ଶ୍ରୀମନ୍ଦିରର ସଂସ୍କାର ନେଇ ସମସ୍ତ ରିପୋର୍ଟ ଜାନୁୟାରୀ ୨ରେ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି । ଯାହାର ଶୁଣାଣି ୮ରେ ହେବ । ତେବେ ଏଭଳି ନିଷ୍ପତି ନିଆଯାଇଥିବା ନେଇ ଶ୍ରୀମନ୍ଦିର ପରିଚାଳନା କମିଟିର ବୈଠକ ପରେ ଶ୍ରୀମନ୍ଦିରର ମୁଖ୍ୟ ପ୍ରଶାସନ କ୍ରିଷନ କୁମାର କହିଛନ୍ତି ।

ଗତ ଡିସେମ୍ବରରେ ନୀତି ବିଭ୍ରାଟ୍‌ ଓ କାର୍ଯ୍ୟାନୁଷ୍ଠାନ ନେଇ ୩ ଜଣ ସେବାୟତଙ୍କୁ କାରଣ ଦର୍ଶାଅ ନୋଟିସ କରାଯାଇଛି। ସେମାନଙ୍କ ଉତର ମିଳିବା ପରେ ଆସନ୍ତା ଜାନୁଆରୀ ୪ ତାରିଖରେ ମନ୍ଦିର ପ୍ରଶାସନରେ ଶୁଣାଣି ହେବ। ରତ୍ନଭଣ୍ଡାରର ଆକଳନ ତଥ୍ୟର ପୂର୍ବ ରେକର୍ଡ ଓ ବର୍ତମାନ ଦାନ ସୂତ୍ରରେ ଆସୁଥିବା ସୁନାରୁପା ଟଙ୍କା ସବୁର ତଥ୍ୟ ଦିଆଯିବ। ଶ୍ରୀମନ୍ଦିର ସୁରକ୍ଷା ବଳୟରେ ଉନ୍ନତୀକରଣ ପାଇଁ ଆର୍କିଟେକ୍‌ଙ୍କୁ ନିଯୁକ୍ତି ଦିଆଯିବ। ମଠର ସମସ୍ତ ସ୍ଥାବର ଓ ଅସ୍ଥାବର ସମ୍ପତିର ମାଲିକାନା ମହାପ୍ରଭୁଙ୍କ ନାଁରେ ରହିବ। ଉଚ୍ଛେଦ ହୋଇଥିବା ଘରୋଇ ପ୍ଲଟ୍‌କୁ ଜଗନ୍ନାଥ ମହାପ୍ରଭୁଙ୍କ ନାମରେ କରିବା ପାଇଁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯିବ ବୋଲି ବୈଠକରୁ ସୂଚନା ମିଳିଛି।

ମାଟିତୋଟାରେ ୧୫ ଏକର ଜାଗାରେ ଆଦର୍ଶ ଗୁରୁକୂଳ ସହ ଭକ୍ତ ନିବାସ ହେବ। ଏଥିରେ ୧୦୦୦ ରୁମ୍‌ର ବ୍ୟବସ୍ଥା ରହିବ। ଶ୍ରୀମନ୍ଦିର ଭିତରେ ଉନ୍ନତିକରଣ ପାଇଁ ସ୍ୱତନ୍ତ୍ର ପ୍ଲାନ୍‌ କରାଯାଇ ପ୍ରତ୍ନତତ୍ତ୍ୱ ବିଭାଗକୁ ଅନୁମୋଦନ ପାଇଁ ଦିଆଯିବ। ଆନନ୍ଦବଜାର ଓ ରୋଷଘର ପାଇଁ ପ୍ରସ୍ତୁତ ହେବ ସ୍ୱତନ୍ତ୍ର ନିୟମାବଳୀ। ମହାପ୍ରସାଦର ରେଟ୍‌ ଚାର୍ଟ ମଧ୍ୟ ଲଗାଯିବ। ଶ୍ରୀମନ୍ଦିରର ଷାଠିଏ ହଜାର ଏକର ଜମିକୁ ଲ୍ୟାଣ୍ଡ ସବ୍‌କମିଟି ଜରିଆରେ ତାଲିକା ଭୁକ୍ତକରି ସୁପ୍ରିମକୋର୍ଟରେ ରିପୋର୍ଟ ଦାଖଲ କରାଯିବ। ଏପଟେ ଶ୍ରୀମନ୍ଦିର ଭିତରେ ଉନ୍ନତି କରଣ ପାଇଁ ସ୍ୱତନ୍ତ୍ର ପ୍ଲାନ୍‌ କରି ପ୍ରତ୍ନତତ୍ତ୍ୱ ବିଭାଗକୁ ଅନୁମୋଦନ ପାଇଁ ଦିଆଯିବ ବୋଲି ସୂଚନା ଦେଇଛନ୍ତି ବରିଷ୍ଠ ସେବାୟତ ବିନାୟକ ଦାସ ମହାପାତ୍ର।

ପରିଚାଳନା କମିଟିର ସ୍ଥାୟୀ ଅଧ୍ୟକ୍ଷ ଗଜପତି ମହାରାଜଙ୍କ ଅଧ୍ୟକ୍ଷତାରେ ଶ୍ରୀମନ୍ଦିର କାର୍ଯ୍ୟାଳୟରେ ବୈଠକ ହୋଇଥିଲା। ଏଥିରେ ଶ୍ରୀମନ୍ଦିର ମୁଖ୍ୟ ପ୍ରଶାସକ, ଜିଲ୍ଲାପାଳ, ଏସ୍‌ପି, ପରିଚାଳନା କମିଟି ସଦସ୍ୟ ଓ ସେବାୟତ ପ୍ରତିନିଧି ପ୍ରମୁଖ ଉପସ୍ଥିତ ଥିଲେ।