ଝାରସୁଗୁଡା: ଚର୍ଚ୍ଚିତ ମା’-ଝିଅଙ୍କୁ ହତ୍ୟା କରିବା ହତ୍ୟାକାଣ୍ଡ ମାମଲାରେ ଗିରଫ ହୋଇଥିବା ଅନୁପ ସାଏଙ୍କୁ ପୋଲିସ ତିନିଦିନିଆ ରିମାଣ୍ଡରେ ନେଇଛି । ଯେଉଁଥିରେ ଏହି ଘଟଣା ସମ୍ପର୍କରେ ଅଧିକ ତଥ୍ୟ ସାମ୍ନାକୁ ଆସିପାରିବ ।
ପୂର୍ବରୁ ଛତିଶଗଡ଼ ରାଜ୍ୟର ରାୟଗଡ଼ ଜିଲ୍ଲା ଚକ୍ରଧରନଗର ପୋଲିସ ଅନୁପ ସାଏଙ୍କୁ ୭ ଦିନିଆ ରିମାଣ୍ଡରେ ନେବା ପାଇଁ କୋର୍ଟରେ ଆବେଦନ କରିଥିଲା। କିନ୍ତୁ ରାୟଗଡ଼ ଜିଲ୍ଲା କୋର୍ଟ ଅନୁପ ସାଏଙ୍କୁ ୩ ଦିନିଆ ରିମାଣ୍ଡରେ ନେବା ପାଇଁ ଅନୁମତି ଦେଇଛନ୍ତି। ରିମାଣ୍ଡ ଅବଧି ଶେଷ ହେବା ପରେ ଫେବ୍ରୁଆରି ୨୨ରେ ଅନୁପ ସାଏଙ୍କୁ କୋର୍ଟରେ ହାଜର କରିବାକୁ ରାୟଗଡ଼ ସିଜେଏମ୍ ଆଦେଶ ଦେଇଛନ୍ତି। ନାର୍କୋ ଟେଷ୍ଟର ନିଷ୍ପତି ନେଇ ନାହାନ୍ତି ମାଜିଷ୍ଟ୍ରେଟ ।
ସେହିପରି ଘଟଣାର ଅନ୍ୟତମ ଅଭିଯୁକ୍ତ ତଥା ଅନୁପ ସାଏଙ୍କ ଡ୍ରାଇଭର ବର୍ଦ୍ଧନ ଟପ୍ପୋଙ୍କୁ ଦିନିକିଆ ରିମାଣ୍ଡରେ ନେବା ପାଇଁ କୋର୍ଟ ଅନୁମତି ଦେଇଛନ୍ତି। ପୋଲିସ ରିମାଣ୍ଡ ସମୟରେ ଅନୁପ ଓ ବର୍ଦ୍ଧନଙ୍କ ଠାରୁ ଆହୁରି ଅନେକ ତଥ୍ୟ ହାସଲ କରିବ ବୋଲି ପୂର୍ବାନୁମାନ କରାଯାଉଛି।
ସୂଚନାଯୋଗ୍ୟ, ରାୟଗଡ଼ ଜିଲ୍ଲା କୋର୍ଟରେ ଝାରସୁଗୁଡ଼ା ଜିଲ୍ଲା ବ୍ରଜରାଜନଗରର ପୂର୍ବତନ ବିଧାୟକ ଅନୁପ ସାଏଙ୍କୁ ମଙ୍ଗଳବାର ହାଜର କରାଯାଇଥିଲା। ଅନୁପ ସାଏଙ୍କୁ ବନ୍ଦୀ ଗୃହରୁ ଅଣାଯାଇ ପୋଲିସର କଡ଼ା ସୁରକ୍ଷା ଭିତରେ କୋର୍ଟକୁ ନିଆଯାଇଥିଲା। ଅନୁପଙ୍କ ସହ ତାଙ୍କ ଡ୍ରାଇଭରଙ୍କୁ ମଧ୍ୟ କୋର୍ଟରେ ହାଜର କରାଯାଇଥିଲା। ତେବେ ହତ୍ୟାକାଣ୍ଡରେ ସଂପୃକ୍ତି ନେଇ ଡ୍ରାଇଭର ବର୍ମନ ଟପ୍ପୋ ଅସ୍ୱୀକାର କରିଥିଲା।