ଭୁବନେଶ୍ଵର: ଅନୁଗୋଳ ବସ୍ଷ୍ଟାଣ୍ଡ ନିକଟ ଆହାର କେନ୍ଦ୍ର ପଛପଟେ ଜଣେ ନାବାଳିକାଙ୍କୁ ଶନିବାର ବିଳମ୍ବିତ ରାତିରେ ବଳାତ୍କାର ପରେ ହତ୍ୟା ଉଦ୍ୟମ ମାମଲା ସୋମବାର ବିଧାନସଭାରେ ଉଠିଥିଲା। ବିରୋଧୀ ଦଳ ନେତା ପ୍ରଦୀପ୍ତ ନାୟକ ଏହି ପ୍ରସଙ୍ଗ ଉଠାଇ ରାଜ୍ୟରେ ଆଇନଶୃଙ୍ଖଳା ପରିସ୍ଥିତି ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି ବୋଲି ପ୍ରଦୀପ୍ତ କହିଥିଲେ। ସେହିପରି ରାଜ୍ୟରେ ଶିଶୁ ନିଖୋଜ ପ୍ରସଙ୍ଗ ଉଠାଇ ବିରୋଧୀ ଦଳ ନେତା ଉଦବେଗ ପ୍ରକାଶ କରିଥିଲେ। ପ୍ରଦୀପ୍ତ କହିଥିଲେ ଯେ, ଶିଶୁମାନଙ୍କୁ କିଏ ଚୋରି କରୁଛି, କେଉଁଆଡ଼େ ଏବଂ କାହିଁକି ନେଉଛି ? ସେମାନଙ୍କୁ ଦେହ ବ୍ୟବସାୟରେ ଲିପ୍ତ କରାଯାଉଛି ନା ଅଙ୍ଗପ୍ରତ୍ୟେଙ୍ଗ କାରବାର କରାଯାଉଛି ବୋଲି ପ୍ରଶ୍ନ କରିଥିଲେ।
ସୂଚନାଯୋଗ୍ୟ, ଶନିବାର ରାତିରେ ଅନୁଗୋଳ ସହରରେ ଜଣେ ନାବାଳିକା ପରିବାର ଲୋକଙ୍କ ସହିତ ଶୋଇଥିବାବେଳେ ଦୁର୍ବୃତ୍ତ ତାଙ୍କୁ ଉଠାଇନେଇ ବଳାତ୍କାର କରିଥିଲେ। ଅନୁଗୋଳ ବସ୍ଷ୍ଟାଣ୍ଡ ନିକଟ ଆହାର କେନ୍ଦ୍ର ପଛପଟେ ଥିବା ଏକ ଅଳିଆ ଗଦାରୁ ରବିବାର ସକାଳେ ନାବାଳିକାଙ୍କୁ ସଂଜ୍ଞାହୀନ ଅବସ୍ଥାରେ ଉଦ୍ଧାର କରାଯିବା ପରେ ଏହି ଘଟଣା ପଦାକୁ ଆସିଛି।