ଗୁଟଖା ବିକ୍ରିର ଯାଞ୍ଚ କରିବେ ଏଡିଜି

ଭୁବନେଶ୍ଵର:ବ୍ୟାନ୍ ସତ୍ଵେ ରାଜ୍ୟରେ ଖୁଲମଖୁଲା  ସର୍ବସାଧାରଣରେ ଗୁଟଖା ବିକ୍ରି ହେଉଛି। ଗୁଟଖା ଉପରେ ପ୍ରତିବନ୍ଧକ କେବଳ ସରକାରୀ କାଗଜକଲମରେ ସୀମିତ ରହିଛି। କୌଣସି କାର୍ଯ୍ୟାନୁଷ୍ଠାନ ନହେବା ଏବଂ ପ୍ରଶାସନିକ ଉଦାସୀନତା କାରଣରୁ ଖୋଲାମେଲା ଗୁଟଖା ବିକ୍ରି ହେଉଛି। ଏହାକୁ ଗମ୍ଭୀରତାର ସହ ନେଇ ରାଜ୍ୟ ମାନବାଧିକାର କମିଶନ ତଦନ୍ତ ନିର୍ଦ୍ଦେଶ ଦେଇଛନ୍ତି। ଏଚଆରପିସି ଏଡିଜିଙ୍କକୁ ତଦନ୍ତ କରି ମାସକ ମଧ୍ୟରେ ରିପୋର୍ଟ ଦେବାକୁ ନିର୍ଦ୍ଦେଶ ଦିଆଯାଇଛି।

ସୂଚନା ଅନୁଯାୟୀ, ରାଜ୍ୟରେ ବ୍ୟାନ୍ ସତ୍ଵେ ଗୁଟଖା ଖୋଲାମେଲା ବିକ୍ରି ନେଇ ଓଡ଼ିଶା ଅଭିଭାବକ ସଂଘ ରାଜ୍ୟ ମାନବାଧିକାର କମିଶନରେ ଅଭିଯୋଗ କରି ଏହା ଉପରେ ପଦକ୍ଷେପ ନେବାକୁ ଆବେଦନ କରିଥିଲେ। ଆବେଦନ ଆଧାରରେ ଓଏଚଆରସି ଏଚଆରପିସି ଏଡିଜିଙ୍କକୁ ତଦନ୍ତ କରି ମାସକ ମଧ୍ୟରେ ରିପୋର୍ଟ ଦେବାକୁ ନିର୍ଦ୍ଦେଶ ଦିଆଯାଇଛି। ଭୁବନେଶ୍ଵରର ବିଭିନ୍ନ ଅଞ୍ଚଳରେ ଯାଞ୍ଚ କରି ରିପୋର୍ଟ ଦେବାକୁ କୁହାଯାଇଛି। 

ଉଲ୍ଲେଖଯୋଗ୍ୟ,  ୨୦୧୫ ଅଗଷ୍ଟ ୧୭ରେ ରାଜ୍ୟ ସରକାର ଗୁଟଖା ଓ ପାନମସଲା ବିକ୍ରି ଉପରେ ନିଷେଧାଦେଶ ଜାରି କରିଥିଲେ। ସେହି ସମୟରେ ରାଜ୍ୟ ସ୍ଵାସ୍ଥ୍ୟ ମନ୍ତ୍ରୀ ଦାମୋଦର ରାଉତ ଗୁଟଖା ଉପରେ ପ୍ରତିବନ୍ଧକ ଲଗାଇବାକୁ ଘୋଷଣା କରିଥିଲେ। 

ଗ୍ଲୋବାଲ ଆଡଲ୍ଟ ଟୋବାକୋର ସର୍ଭେ ଅନୁଯାୟୀ ରାଜ୍ୟର ୪୩ ପ୍ରତିଶତ ଲୋକ ଗୁଟଖା ବ୍ୟବହାର କରନ୍ତି। ଫଳରେ ରାଜ୍ୟରେ ଅଧିକ ମାତ୍ରାରେ କ୍ୟାନ୍ସର ଘଟଣା ମଧ୍ୟ ଦେଖିବାକୁ ମିଳୁଛି। ପ୍ରତ୍ୟେକ ବର୍ଷ ୧୦ ହଜାରରୁ ଅଧିକ ନୂତନ ପାଟି କ୍ୟାନ୍ସର ରୋଗୀ ହସ୍ପିଟାଲରେ ଭର୍ତ୍ତି ହେଉଛନ୍ତି।