କ’ଣ ଏଥର ଫିଲ୍ମ କଳାକାର ରାଜନୀତିରେ ବାଜି ମାରିବେ ଜାଣନ୍ତୁ

ଭୁବନେଶ୍ୱର : ଚଳିତ ଲୋକସଭା ଏବଂ ବିଧାନସଭା ନିର୍ବାଚନରେ କେତେକ ବଲିଉଡ୍‌, ଓଲିଉଡ୍‌, ଭୋଜପୁରୀ ଏବଂ ଅନ୍ୟାନ୍ୟ ଆଞ୍ଚଳିକ କଳାକାରମାନେ ବିଭିନ୍ନ ଦଳରୁ ପ୍ରାର୍ଥୀ ହୋଇଥିଲେ । ଆସନ୍ତୁ ଜାଣିବା ପ୍ରଥମେ ସେମାନଙ୍କ ମଧ୍ୟରୁ କେଉଁମାନେ ଭୋଟ ଗଣତି ଟ୍ରେଣ୍ଡ ଆଗରେ ଅଛନ୍ତି ।

କେନ୍ଦ୍ରମନ୍ତ୍ରୀ ତଥା ବଲିଉଡ୍‌ର ଲୋକପ୍ରିୟ ଗାୟକ ତଥା ପଶ୍ଚିମବଙ୍ଗର ଆସନସୋଲର ବିଜେପି ଲୋକସଭା ପ୍ରାର୍ଥୀ ବାବୁଲ ସୁପ୍ରିଓ ଭୋଟ ଗଣତିରେ ଢ଼େର ଆଗରେ ରହିଛନ୍ତି । ବଲିଉଡ୍‌ର ଲୋକପ୍ରି୍ରୟ ଅଭିନେତା ତଥା ବିଜେପି ଲୋକସଭା ପ୍ରାର୍ଥୀ ସନ୍ନି ଦେଓଲ ପଞ୍ଜାବର ଗୁରୁଦାସପୁର ଆସନରୁ ଆଗରେ ଅଛନ୍ତି । ଠିକ୍‌ ସେହି ପରି ବଲିଉଡ୍‌ର ଡ୍ରିମ୍‌ ଗର୍ଲ ହେମା ମାଳିନୀ ଉତ୍ତରପ୍ରଦେଶର ମଥୁରା ଆସନରେ ବିଜେପି ଲୋକସଭା ପ୍ରାର୍ଥୀ ଭାବେ ଆଗରେ ଅଛନ୍ତି । ଲୋକପ୍ରିୟ ଚରିତ୍ର ଅଭିନେତ୍ରୀ ତଥା ବିଜେପି ପ୍ରାର୍ଥୀ କିରଣ ଖେର୍‌ ପଞ୍ଜାବର ଚଣ୍ଡିଗଡ଼ ଆସନରୁ ମଧ୍ୟ ଆଗରେ ରହିଛନ୍ତି । କେନ୍ଦ୍ରମନ୍ତ୍ରୀ ତଥା ବିଜେପିର ଆମେଥି ଲୋକସଭା ପ୍ରାର୍ଥୀ ସ୍ମୃତି ଇରାନୀ ଆଗୁଆ ଅଛନ୍ତି । ଭୋଜପୁରୀ ସୁପରଷ୍ଟାର ତଥା ଦିଲ୍ଲୀ ବିଜେପି ପ୍ରଦେଶ ଅଧ୍ୟକ୍ଷ ମନୋଜ ତିଓ୍ଵାରୀ ଉତ୍ତର-ପୂର୍ବ ଦିଲ୍ଲୀ ଆସନରୁ ଆଗରେ ରହିଛନ୍ତି । ଠିକ ସେହିପରି ଭୋଜପୁରୀ ସୁପରଷ୍ଟାର ରବି କିସନ ମଧ୍ୟ ବିଜେପି ପ୍ରାର୍ଥୀଭାବେ ଉତ୍ତରପ୍ରଦେଶର ଗୋରଖପୁରରୁ ଯଥେଷ୍ଟ ଭୋଟ ବ୍ୟବଧାନରେ ଆଗରେ ରହିଛନ୍ତି । ବଲିଉଡ୍ ଅଭିନେତ୍ରୀ ତଥା ଲୋକସଭା ନିର୍ବାଚନରେ ମହାରାଷ୍ଟ୍ରର ଉତ୍ତର ମୁମ୍ବଇ ଆସନରୁ ଲଢୁଥିବା କଂଗ୍ରେସ ପ୍ରାର୍ଥୀ ଉର୍ମିଳା ମାତୋଣ୍ଡକର ପଛୁଆ ରହିଛନ୍ତି । କେନ୍ଦ୍ରାପଡ଼ାର ବିଜେଡ଼ି ଲୋକସଭା ପ୍ରାର୍ଥୀ ତଥା ଓଲିଉଡ୍‌ ସୁପରଷ୍ଟାର ଅନୁଭବ ମହାନ୍ତି ମଧ୍ୟ ଆଗୁଆ ରହିଛନ୍ତି ।