ନୂଆଦିଲ୍ଲୀ: ବିଶ୍ୱବ୍ୟାପି କୋରୋନା ଭାଇରସର ଭୟ ଲାଗି ରହିଥିବାବେଳେ ବର୍ତମାନ ସୁଦ୍ଧା ଭାରତରେ ରୋଗୀ ସଂଖ୍ୟା ୫୬ରେ ପହଂଚିଛି ।
କୋରୋନାର ମୁକାବିଲା ପାଇଁ କେନ୍ଦ୍ର ଓ ରାଜ୍ୟ ସରକାରମାନେ ଅନେକ ପଦକ୍ଷେପ ଗ୍ରହଣ କରୁଥିଲେ ହେଁ ଏହି ରୋଗ ଦିନକୁ ଦିନ ବଢ଼ିବାରେ ଲାଗିଛି। ଆଜି କେରଳରେ ୬ ଜଣ ନୂଆ କୋରୋନା ରୋଗୀ ଚିହ୍ନଟ ହୋଇଥିବା ମୁଖ୍ୟମନ୍ତ୍ରୀ ପିନରାୟୀ ବିଜୟନ ସୂଚନା ଦେଇଛନ୍ତି। ଅର୍ଥାତ କେରଳେ କୋରୋନା ଭୂତାଣୁରେ ଆକ୍ରାନ୍ତଙ୍କ ସଂଖ୍ୟା ୧୫ ଛୁଇଁଛି। ତେବେ ଏମାନଙ୍କ ମଧ୍ୟରୁ ୩ ଜଣ ସୁସ୍ଥ ହୋଇ ଘରକୁ ଫେରି ସାରିଛନ୍ତି।
ସେହିପରି କର୍ଣ୍ଣାଟକ ସ୍ୱାସ୍ଥ୍ୟମନ୍ତ୍ରୀଙ୍କ କହିବା ଅନୁଯାୟୀ, ବେଙ୍ଗାଲୁରୁ ଓ ଏହାର ଆଖପାଖ ଅଂଚଳରେ ୩ ଜଣ ଲୋକ କୋରୋନା ଭାଇରସରେ ଆକ୍ରାନ୍ତ ହୋଇଥିବା ପରୀକ୍ଷାରୁ ଜଣାପଡ଼ିଛି। ଏହି ନୂଆ କୋରୋନା ରୋଗୀଙ୍କୁ ସ୍ୱତନ୍ତ୍ର ୱାର୍ଡରେ ରଖି ଚିକିତ୍ସା ଯୋଗାଇ ଦିଆଯାଉଛି। ଏମାନଙ୍କ ଯୋଗାଯୋଗରେ ଆସିଥିବା ଲୋକଙ୍କୁ ମଧ୍ୟ ନୀରିକ୍ଷଣ କରାଯାଉଛି।
ଅନ୍ୟପକ୍ଷରେ ତାମିଲନାଡୁରେ କରୋନା ସନ୍ଦିଗ୍ଧରେ ୮ ଜଣଙ୍କ ନମୁନା ପରୀକ୍ଷା କରାଯାଇଥିଲା। ହେଲେ ପରୀକ୍ଷା ପରେ ଏହା ନେଗେଟିଭ ଆସିଛି।
କେରଳ ସ୍ୱାସ୍ଥ୍ୟ ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ, କୋରୋନାରେ ଆକ୍ରାନ୍ତ ହୋଇ ବର୍ତମାନ ୧୨ ଜଣ ଚିକିତ୍ସିତ ହେଉଛନ୍ତି। ଆଜି ଚିହ୍ନଟ ହୋଇଥିବା ୬ ଜଣଙ୍କ ମଧ୍ୟରୁ ୪ ଜଣ କୋଟ୍ଟାୟମ ଓ ୨ ଜଣ ପାଥନମଥିଟ୍ଟା ଅଂଚଳର। ଇଟାଲୀରୁ ଫେରିଥିବା ଲୋକଙ୍କୁ ଆଣିବା ପାଇଁ ଯାଇଥିବା ବେଳେ ସମସ୍ତ ୪ ଜଣ ଯାକ କୋରୋନାରେ ଆକ୍ରାନ୍ତ ହୋଇଛନ୍ତି। ସେହିପରି ଜଣେ ୯୦ ବର୍ଷୀୟ ବୃଦ୍ଧ ଓ ୮୫ ବର୍ଷୀୟା ବୃଦ୍ଧା ମଧ୍ୟ କୋରୋନାରେ ଆକ୍ରାନ୍ତ ହୋଇଛନ୍ତି।