ନୂଆଦିଲ୍ଲୀ: ଆସନ୍ତାକାଲି ନିର୍ଭୟା ମାମଲାର ୪ ଦୋଷୀ ପାଇବେନି ଫାଶୀ। ପରବର୍ତୀ ନିଷ୍ପତି ଆସିବା ଯାଏଁ ଶନିବାର ହେବାକୁ ଥିବା ଫାଶି ଉପରେ ରୋକ ଲଗାଇଛନ୍ତି ଦିଲ୍ଲୀ ପଟିଆଲା ହାଉସ କୋର୍ଟ । ଦୋଷୀ ବିନୟର ଦୟା ଯାଚିକାର ନିଷ୍ପତି ଆସି ନଥିବା କାରଣରୁ ଫାଶି ଉପରେ ରହିତାଦେଶ ଜାରି କରିଛନ୍ତି କୋର୍ଟ । ଧାରା ୮୩୬ ଅନୁଯାୟୀ ଏହି ଫାଶୀ ତାରିଖ ଘୁଂଚାଯାଇଛି । ଏହି ନିୟମ ଅନୁସାରେ ଦୟା ଯାଚିକାର ନିଷ୍ପତି ନ ଆସିବା ଯାଏଁ ଦୋଷୀଙ୍କୁ ଫାଶୀ ହୋଇପାରିବ ନାହିଁ । ନିର୍ଭୟା ମାମଲାରେ ଦ୍ବିତୀୟ ଥର ପାଇଁ ଦୋଷୀଙ୍କ ଫାଶୀ ଉପରେ ରହିତାଦେଶ ଲାଗିଛି ।
କୋର୍ଟଙ୍କ ନିଷ୍ପତି ଉପରେ ନିର୍ଭୟାଙ୍କ ମାଆ ନିଜର ପ୍ରତିକ୍ରିୟା ରଖିଛନ୍ତି । କେବେ ବି ଫାଶୀ ହେବ ନାହିଁ ବୋଲି ଦୋଷୀଙ୍କ ଓକିଲ ଏପି ସିଂହ ଚ୍ୟାଲେଞ୍ଜ କରିଥିବା କହିଛନ୍ତି ନିର୍ଭୟା ମାଆ । ନିର୍ଭୟା ମାଆ ପୁଣି କହିଛନ୍ତି, ମୁଁ ମୋ ଲଢେଇ ଜାରି ରଖିବି । ସରକାର ଦୋଷୀଙ୍କୁ ଫାଶୀ ଦେବେ।
ନିର୍ଭୟା ଘଟଣାର ଦୋଷୀ ଫାଶୀରୁ ବଂଚିବା ପାଇଁ ସମସ୍ତ ପ୍ରକାର ଆଇନଗତ ବିକଳ୍ପର ସାହାରା ନେଉଛନ୍ତି । ଗୁରୁବାର ଦୋଷୀ ବିନୟର ଫାଶୀ ଉପରେ ରୋକ ଲଗାଇବା ପାଇଁ ଆବେଦନ କରାଯାଇଥିଲା । ପଟିଆଲା ହାଉସ କୋର୍ଟରେ ବିନୟ ପକ୍ଷରୁ ଯାଚିକା ଦାଖଲ କରାଯାଇ ଦୟାଯାଚିକା ଉପରେ ରାଷ୍ଟ୍ରପତିଙ୍କ ନିଷ୍ପତି ନ ଆସିଥିବାରୁ ଫାଶୀ ଉପରେ ରହିତାଦେଶ ଲଗାଇବା ପାଇଁ ଅପିଲ କରାଯାଇଥିଲା ।