ରାଉଲକେଲା: ଓଡ଼ିଶା-ଝାଡଖଣ୍ଡ ସୀମାନ୍ତରୁ ପ୍ରାୟ ୪୫ କି.ମି. ଦୂର କରାଇକେଲା ଥାନା ଅଂଚଳରୁ କମ୍ବିଂ ଅପରେସନ୍ ବେଳେ ଯବାନମାନେ ସିଲିଣ୍ଡର ବୋମା ଉଦ୍ଧାର କରିଥିଲେ। ଏହି ଘଟଣାର ୨୪ ଘଂଟା ପରେ ଗତକାଲି ସିଆର୍ପିଏଫ୍ ଯବାନମାନେ କରାଇକେଲା ଥାନା ଅନ୍ତର୍ଗତ ରଞ୍ଜଡାକୋଚା ପାହାଡ଼ ନିକଟରୁ ଦୁଇ ନକ୍ସଲଙ୍କୁ ଗିରଫ କରିଥିବା ଜଣାଯାଇଛି । ଗିରଫ ନକ୍ସଲମାନେ ମାନେ ହେଲେ ପଶ୍ଚିମ ସିଂହଭୂମ ଜିଲ୍ଲା ଅନ୍ତର୍ଗତ ପଦ୍ମପୁରର ବିଜୟ ପ୍ରଧାନ, ଲୋଦୋଡ଼ିହିର ଦଶରଥ ମହାତୋ।
ଏମାନଙ୍କ ନିକଟରୁ ୫ ଲକ୍ଷ ୨୦ ହଜାର ଟଙ୍କା, ବାଇକ୍, ମାଓବାଦୀ ସ୍ଲୋଗାନ ଲେଖାଥିବା ବ୍ୟାନର୍, ମାଓ ପୋଷ୍ଟର ସମେତ ତିନିଟି ମୋବାଇଲ ଜବତ ହୋଇଛି । ସିଆର୍ପିଏଫ୍ ଯବାନଙ୍କୁ ଟାର୍ଗେଟ କରିବାକୁ ରଞ୍ଜଡାକୋଚା ପାହାଡ଼ ନିକଟରେ ବିଜୟ, ଦଶରଥଙ୍କ ନେତୃତ୍ୱରେ କିଛି ନକ୍ସଲ ଏକାଠି ହୋଇଥିବା ସମ୍ପର୍କରେ ସୂଚନା ମିଳିଥିଲା।
ସ୍ଥାନୀୟ ପୋଲିସ ଓ ସିଆର୍ପିଏଫ୍ ଯବାନମାନେ ପାହାଡ଼କୁ ଘେରାବନ୍ଦୀ କରି ସର୍ଚ୍ଚ ଅପରେସନ୍ ଆରମ୍ଭ କରିଥିଲେ। ଯବାନମାନଙ୍କୁ ଦେଖି ନକ୍ସଲମାନେ ସେଠାରୁ ଖସିଯିବାକୁ ଦୌଡ଼ିବାକୁ ଲାଗିଥିଲେ। ଯବାନମାନେ ସେମାନଙ୍କ ପିଛା କରି ବିଜୟ ଓ ଦଶରଥକୁ କାବୁ କରିଥିଲେ । ଅନ୍ୟମାନେ ସେଠାରୁ ଚମ୍ପଟ ମାରିଥିଲେ। ସଙ୍ଗଠନକୁ ମଜବୁତ କରିବା ପାଇଁ ଠିକାଦାରଙ୍କଠୁ ବଟି ଆଦାୟ ଓ ସିଆର୍ପିଏଫ୍ ଯବାନଙ୍କୁ ଟାର୍ଗେଟ କରିବାକୁ ଏଭଳି ଯୋଜନା କରୁଥିବା ପୋଲିସ କହିଛି। ଘଟଣା ପରେ ସ୍ଥାନୀୟ ଅଂଚଳରେ କମ୍ବିଂ ଅପରେସନ୍କୁ ଯୋଜନା କରାଯିବା ସହ ନକ୍ସଲଙ୍କ ଗତିବିଧି ଉପରେ କଡ଼ା ନଜର ରଖାଯାଇଛି।