କଂଗ୍ରେସକୁ ଏକ ବଡ ଝଟକା

ହାଇଦରାବାଦ : ଲୋକସଭା ନିର୍ବାଚନର ଶୋଚନୀୟ ପରାଜୟ ଗ୍ଲାନିରୁ ବାହାରି ପାରିନଥିବା କଂଗ୍ରେସକୁ ତେଲଙ୍ଗାନାରୁ ବଡ଼ ଝଟକା ଲାଗିଛି। ତେଲଙ୍ଗାନା କଂଗ୍ରେସର ୧୮ ବିଧାୟକଙ୍କ ମଧ୍ୟରୁ ୧୨ଜଣ ଦଳ ଛାଡ଼ିବାକୁ ବିଧାନସଭାରେ ଆବେଦନ କରିଛନ୍ତି। ସେମାନେ ନିଜ ଦଳୀୟ ପରିଚୟ କଂଗ୍ରେସରୁ ବଦଳାଇ ତେଲଙ୍ଗାନା ରାଷ୍ଟ୍ରୀୟ ସମିତି (ଟିଆରଏସ୍‍) କରିବାକୁ ବିଧାନସଭା ବାଚସ୍ପତିଙ୍କୁ କହିଛନ୍ତି। କଂଗ୍ରେସର ତିନି ଭାଗରୁ ଦୁଇ ଭାଗ ବିଧାୟକ ଦଳ ବଦଳାଉଥିବାରୁ ସେମାନଙ୍କ ସଦସ୍ୟତା ରଦ୍ଦ ହେବ ନାହିଁ। କାରଣ ତିନି ଭାଗରୁ ଦୁଇ ଭାଗ ବିଧାୟକ ଦଳ ବଦଳାଇବା ସ୍ଥିତିରେ ଦଳବଦଳ ବିରୋଧୀ ଆଇନ ଲାଗୁ ହୁଏ ନାହିଁ।

ପ୍ରକାଶ ଯେ ତେଲଙ୍ଗାନା ବିଧାନସଭା ନିର୍ବାଚନରେ ଟିଆରଏସ୍‍ ୧୧୯ରୁ ୮୮ ଆସନ ଜିତି ଏକାକୀ ସଂଖ୍ୟାଗରିଷ୍ଠ ଦଳ ଭାବେ ସରକାର ଗଠନ କରିଛି। ଏଠାରେ କଂଗ୍ରେସ ୧୮ ବିଧାନସଭା ଆସନରେ ବିଜୟୀ ହୋଇଥିଲା। ନିର୍ବାଚନ ପରଠାରୁ କଂଗ୍ରେସରେ ଅନ୍ତଃକନ୍ଦଳ ଲାଗି ରହିଥିଲା। କଂଗ୍ରେସର ଅନେକ ନେତା ରାଜ୍ୟ ନେତୃତ୍ୱକୁ ନେଇ ଅସନ୍ତୁଷ୍ଟ ଥିଲେ। କଂଗ୍ରେସର ୧୮ ବିଧାୟକ ମଧ୍ୟରୁ ୧୨ ଜଣ ବାଚସ୍ପତିଙ୍କୁ ପତ୍ର ଲେଖି ଟିଆରଏସ୍‍ରେ ସାମିଲ ହେବାକୁ କହିଛନ୍ତି। ସମସ୍ତେ ଖୁବଶୀଘ୍ର କଂଗ୍ରେସରୁ ଇସ୍ତଫା ଦେଇ ଟିଆରଏସରେ ଆନୁଷ୍ଠାନିକ ଭାବେ ଯୋଗଦେବେ।