୪୦୦୦ ପଣ୍ଡିତଙ୍କୁ ନେଇ ଯଜ୍ଞ କରିବେ କେସିଆର: ପ୍ରଧାନମନ୍ତ୍ରୀଙ୍କୁ କରିବେ ନିମନ୍ତ୍ରଣ

ହାଇଦରାବାଦ : ତେଲଙ୍ଗାନା ମୁଖ୍ୟମନ୍ତ୍ରୀ ଚନ୍ଦ୍ରଶେଖର ରାଓ (କେସିଆର) ଏକ ବିଶାଳ ଯଜ୍ଞ ଆୟୋଜନ କରୁଛନ୍ତି। ଏଥିପାଇଁ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି। ୟାଦାଦ୍ରୀ ଭୁବନଗିରି ଜିଲାର ହିନ୍ଦୁ ପାହାଡ଼ି ମନ୍ଦିରରେ ଏହି ଯଜ୍ଞ କରାଯିବ। ମୁଖ୍ୟମନ୍ତ୍ରୀ ଚନ୍ଦ୍ରଶେଖର ରାଓ ଏନେଇ ମଙ୍ଗଳବାର ତ୍ରିଦାନ୍ଦୀ ଚିନ୍ନା ଜିୟାର ସ୍ୱାମୀଙ୍କ ଆଶ୍ରମରେ ପହଞ୍ଚି ଆଲୋଚନା କରିଥିଲେ। ଖୁବଶୀଘ୍ର ଯଜ୍ଞର ତାରିଖ ଏବଂ ସମୟ ଘୋଷଣା କରାଯିବ ବୋଲି କୁହାଯାଇଛି।
ମହାସୁଦର୍ଶନ ନାମକ ଏହି ଯଜ୍ଞ ହାଇଦରାବାଦଠାରୁ ୬୫ କିଲୋମିଟର ଦୂର ଭଗବାନ ନରସିଂହଙ୍କୁ ସମର୍ପିତ ଶ୍ରୀଲକ୍ଷ୍ମୀ ନରସିହ୍ମା ମନ୍ଦିର ନିକଟରେ କରାଯିବ। ଏହି ମନ୍ଦିରରୁ ୟାଦାଦ୍ରୀ ବୋଲି ମଧ୍ୟ କୁହାଯାଏ। ଏଥିପାଇଁ ୧୦୦ ଏକରର ଯଜ୍ଞ ବାଟିକାରେ ଇଟାରେ ଛୋଟ ଛୋଟ ମଞ୍ଚ ଓ ୧୦୪୮ ଯଜ୍ଞ କୁଣ୍ଡ ନିର୍ମାଣ କରାଯିବ। ମୁଖ୍ୟମନ୍ତ୍ରୀ କାର୍ଯ୍ୟାଳୟ ମୁଖପାତ୍ର କହିଛନ୍ତି ଯେ ୧୦୦୦ରୁ ଊର୍ଦ୍ଧ୍ବ ପଣ୍ଡିତ ଯଜ୍ଞ କରିବେ ଓ ଅନ୍ୟ ୩୦୦୦ ସହାୟକ ଏକ ଦିବସୀୟ ଯଜ୍ଞ କାର୍ଯ୍ୟକ୍ରମ ସଂଚାଳନ କରିବେ। ଏଥିପାଇଁ ବଦ୍ରିନାଥ, ଶ୍ରୀରଂଗମ, ଜଗନ୍ନାଥ, ତିରୁପତି ଏବଂ ଅନ୍ୟ ଦେଶର ଅନ୍ୟ ବୈଷ୍ଣବ ପୀଠ ଏବଂ ମଠର ଅଧିପତିଙ୍କୁ ଆମନ୍ତ୍ରିତ କରାଯାଇଛି। ସୁଦର୍ଶନ ଯଜ୍ଞ ସହ ସମ୍ପର୍କିତ ହିନ୍ଦୁ ସମ୍ପ୍ରଦାୟର ଅଧ୍ୟାତ୍ମିକ ପ୍ରମୁଖଙ୍କ ସମେତ ପ୍ରଧାନମନ୍ଦ୍ରୀ ନରେନ୍ଦ୍ର ମୋଦୀ, କେନ୍ଦ୍ର ସରକାରଙ୍କ ବରିଷ୍ଠ ନେତା, ସମସ୍ତ ମୁଖ୍ୟମନ୍ତ୍ରୀ, ରାଜ୍ୟପାଳ ଏବଂ ମନ୍ତ୍ରୀଙ୍କୁ ନିମନ୍ତ୍ରିତ କରାଯିବ। ଏଥିରେ ସାଧାରଣ ଲୋକଙ୍କୁ ସାମିଲ କରିବାକୁ ରାଜ୍ୟ ସରକାର ବିଚାର କରୁଛନ୍ତି ବୋଲି ମୁଖପାତ୍ର ସୂଚନା ଦେଇଛନ୍ତି।